Wees fief Minuten still
9. Juni


Andacht vun Heinrich Giesen, in Platt bröcht vun Marlou Lessing
To'n Anhören hier klicken:
Lesen deit Marlou Lessing.

Ji sünd alltohoop leidige Tröösters.

Hiob 16, 2

Gifft dat woll Minschen, de dat vun uns seggen doot? Dree Lü möht sik üm den swaar pröövten Hiob. Een na den annern snackt se mit em, de Diskuschoonen treckt sik in de Längde. Endlich langt dat Hiob: "Leidige Tröösters!" — Wat doot wi mit de Minschen blangen uns in ehr Noot? Diskereert wi de weg? Snackt wi mit ehr över Gott? Leidige Tröösters! Wi schulln wat anners doon. Wi schulln mit Gott över de Mitminschen in Noot snacken. Eerst wenn wi mit Gott snackt hebbt, köönt wi hengahn. Un denn geiht dat jümmers noch nich dorüm, mit ehr över Gott to snacken, sünnern mit ehr to Gott to snacken. Dennso warrt wi mit ehr beden möten. Hiob kunn dat nich. Sien Mund is stumm vör Pien. De Muur is to hooch, sien Weg is verschütt. He kann nich wieder. Wi mööt hen. Wi mööt för em över de Muur kieken, för em Verbinnen opnehmen mit den, de sik vun Harten üm uns Seelen annehmen kann.

Dat gifft mennigeen Hiob in uns Daag. Un dat gifft leidige Tröösters. Wi schulln endlich to Hiob gahn as de, de Gott em schickt. Gott will dat dör sien Hilligen Geist doon, dat de glimmen Docht nich verlöschen deit. Em schulln wi anropen, ehrdat wi uns op den Weg maakt.

De Geist kann mi bi di vertreden mit Süüfzen, de nich uttodrücken sünd;
he lehrt mi recht vun Harten beden un maakt mi dat gewiss, dat ik dien Kind
un Mit-Arv bün vun Jesus Christ un dat du mien leev Vadder büst.


13.6.2020


na baven