Wees fief Minuten still
10. Dezember

Du avers, Dochter Zion, frei di över all Maten, un du, Dochter Jerusalem, juchhei vör Freid! Süh doch, din König kümmt to di, en Gerechte un en Hölpsmann, arm, un he ridd op'n Esel, op en Fahlen, dat Lütt vun de Eselstuut.

Sacharja 9,9

Ja, dat's wohr! He is en Gerechte un togliek en Hölpsmann.

Wat wi ok över Gott seggt, wi seggt allmaal ok wat vun düt Doon vun Gott: dat he sin Söhn us to'n Christus maakt hett. Bloots so kunn he us helpen, dat de Gerechte us sin Gerechtigkeit schenkt hett un daför uns' Sünnen nahmen hett. Dorwegen is düsse Gerechte togliek uns' Helper.

'keen davun stillswiggt, de snackt ok nich vun Gott. Hööchstens as etwa bi't Jubiläum vun uns' Vadder de Börgemeester snacken wöör: dat Vadder in de Stadt Straten orr Hüüs buut harr un ok besünnere Verdeensten üm den Botanischen Goorn harr. De Kinner weet avers mehr vun ehrn Vadder: dat de Vadder ehr leev hett! Man dorvun schrievt de Bläder nich. Dat is Privaatsaak, seggt se. Wat wi vun Jesus denkt, is ok Privaatsaak, seggt se. Dorbi is düsse Privaatsaak en Begeevnis mit Weltbedüden! He is en Gerechte un en Hölpsmann. Un bloots de, de sik hett helpen laten, kann davun snacken. De kann seggen: "He is min Helper!"

Dat kannst! Kinner köönt mehr vun ehrn Vadder seggen as annere...