Wees fief Minuten still
18. April


Andacht vun Heinrich Giesen, in Platt bröcht vun Marlou Lessing

As se avers davun an't Snacken weern, keem he sülven, Jesus, merrnmang ünner ehr un sä to ehr: Freed wees mit juuch!

Lukas 24, 36

Düsse Freed, den Jesus Christus bringt, is wichtiger för us as de Freed twüschen Land un Land un Minsch un Minsch. Denn alleen mit den Freed twüschen Land un Land un Minsch un Minsch kann nüms selig starven un kümmt nüms in'n Himmel. Nu avers kannst Di, so mit tachentig Johr, an't Starven maken, wieldat du weetst, Freed is twüschen Gott un us. Kannst in junge Johr, Krieg orr nich Krieg, in Freden doodblieven, wieldat du weetst, twüschen Gott un us is keen Fehd nich.

Sogoor wenn de Welt noch in'n Krieg leevt, Nahver mit Nahver, Kontinent mit Kontinent: Jesus sin Freed gellt.

Damit, dat Jesus düt Woort seggt, hett he nich en frommen Wunsch utspraken, sünnern en Würklichkeit schafft. Düsse Freed gellt. 'keen över düssen Freed in de Oostertied stillswiegt, maakt Oostern to'n Fest vun Blomen, Blöden un Grööntüüch. Oostern hett avers nix mit Blöhtied un Dauweder to doon, ok nix mit Dauweder twüschen Völker. Gott wees Dank! Denn dat warrt Tieden geven, 'neem dat keen Blöhtied mehr geven warrt. Avers dat warrt nienich en Tied geven, 'neem dat Gotts Freden nich mehr gifft. Denn Jesus maakt ewige Saken, nich welk för den Momang.

O Gott un Herr, giff, dat wi mang den Striet in de Welt nich an din Freden twieveln doot. Nix schall us wegrieten vun din Leevde, de in Jesus Christus is.


20.4.2008


na baven