Gewalt tegen Gewalt

Se stahn unner sien Beheer.
Se mutten sien Bedwang vullhollen.
Se leven still unner d' Slag.
He hett dat Gesagg over hör.
He lett hör de Gewalt spören.
He hett hör unner sien Fuchtel.
Well neet sien Leed singt,
De is verdammt bit an 't Enn
Van sien elende Leven
Over Schendaarms un Suldaten
Is he de Baas.
Well sük neet föögt, de is dood.
So hett he de Minsken
Reinundall unner.

Een Steen fallt in 't Water,
Treckt mehr un mehr Kringen.
Een Minsk na de anner
Brullt freei sük de Seel.
Jan Rapp un sien Maten,
Se störmen de Straten.
Mit Knüppels un Stangen
Mit Schüppen un Seisen,
Mit Förken un Plenters
Un hen un weerdenn
Ok en Gewehr.
Schendaarms un Suldaten,
Se wesseln de Sieden.
Hören to 't Volk.

Oog um Oog

Gifft dat en Gott,
De Haat preken deit,
So Oog um Oog
Un Tann um Tann,
Un stüürt he sien Jüngers
Unner 't Volk up de Straat,
Verdarvt dat Volk
In d' Krieg tegen de
Allmachtige Keerl,
Tyrann in d' Palast,
Versuurt de Trank
Van all de Gerechten
Mit dat Eterg van Haat,
Van Haat un Gewalt
Lett greien de Saad
Van Frevel un Grull.