Fredensmantel, wokeen müttst du
allens schütten?
Gott, schick all Engel ut, de Düwel to temen!
Der Mantel des Friedens, Foto vun Karin Jung,
wiest bi Pixelio.
De Skulptuur finnst up de Südensiet vun den Karkhof vun St Severin
in Keitum.
De Künstlerin Anna Chromy nöömte ehr Wark ok Pietá,
also Mitleed, Barmen, dat ganze Leed vun de Welt.
Swatt, nix, wo twei Ogen sien kunnen,
een Gesicht, dat lacht orrer truurt,
wo een Smüstern huscht
orrer Tranen lopen.
Swatt! Bloots swatt!
Fredensmannel? Warmen, schütten Hüll?
Kümmt Rauh röver na di?
Mi schuddert. Mi frööst
ann Dag, ine Nacht!
Alltiets!
Dor steiht een Kriegerdenkmaal.
1871 güng dat gegen de Franzosen.
Hier dat neegst, 1914-1918!
Nu al gegen de halfe Welt.
1939-1945, Wahnsinn is dat.
Un wat passeert nu, wo ik dit schriev?
In Afghanistan? Inn Kosovo?
Is jümmer Krieg överall!
Se fleigen de Särg
na Huus.
Un dat allens ünner den Mantel vun Freden?
Noch is kein Dauk groot naug,
de Mörderie to sticken.
Allens is swatt.
Pickenswatt!
Un de Levigen buuen
al lang keen Denkmaal miehr
för de Doden, de Terroristen
elkeen Dag mit Bomben
tweirieten, Fruuns un Kinner
in lieke Wies.
De Doot kümmt mit de Post,
hei steiht in en S-Bahn as Kuffer,
Märtyrer dreegt em ann Lief
un sprengt sik mit vele Minschen
in ne Kark ine Luft.
Is wedder Krieg, wohrhaft Krieg.
Taliban un El Kaida heiten se.
Un Bin Laden.
Is wedder Krieg, wohrhaft Krieg
överall.
Dat gifft keen Mantel vun Freden.
Minschen wörgen sik,
wo se bloots köönt.
Sünd Kain un Abel upstahn
ut en anner Welt?
Fredensmantel, wokeen müttst du
allens schütten?
Gott, schick all Engel ut, de Düwel to temen.
Un bring uns en groot Fredensdauk!
Himmelsschiev vun Nebra, Bild: Daag/Wikimedia
Commons
|