Ostern 2025 störw Paopst Franziskus

van Ludgerd Lüske

An’n Ostermaondag, den 21. April 2025, störw Paopst Franziskus, born at Jorge Mario Bergoglio, in dat hooge Öller van 88 Johre. An'n Vördag, den Oostersönndag, harr hei noch den Segen för dei Welt spennt; in dei Nacht is hei gaohn. Hei hett bookstäävlich "dat Tiedliche segent". Wat för ein Afgang för ein fraomen Christenminschen!

Dei Dood van den Üppsten van dei katholschke Karken maokt dei heile Welt truurig. Dei eierste Paopst ut Südamerikao stünd för ein sporsaomet Läben, för soziaole Gerechtigkeit un för eine bätere Ümwelt. Nao seine Waohl at Paopst in dat Johr 2013 achde hei up dei  Armen un dei minneachten Menschken. Dei Karken schull mehr barmhartig wän un Leiwde wiesen.

Sien oprichtig un bescheiden Wäsen, sien Hartensfraomigkeit un persönliche Integrität was so äöwertügen, dat dei Minschken in aal dei Welt em vertrugen un em hoch achten dän.

Blieben dait Paopst Franziskus sien Wark at Reformer un Brüggenbawer. In siene Amtstied güng et üm Aktionen gägen den Klimawannel, för den bäteren Ümgang mit dei annern Religionen un för moderne Karken-Strukturen. Un dorbi aaltied üm unbedingte Minschlichkeit. Dat wieset uck dat Wappen, dat Franziskus sik tauleggt hett:

Blangen dat Jesus-Symbol un dei Symbolen Steern un Fruchtdolde för den Glowen steiht ünnen dei Waohlsprook, dei op Platt heit:

Sien Dood wiest dat End van eine besünnere Tied. Nu äöwerlegg man, wecker woll nao üm kummp, un wo dei dat Wark van Paopst Franziskus wiederloopen lätt.

Van Middewäken-Vörmdag an staiht dei Sarg in den Petersdom. Man räket mit väle Christen ut aale Welt, dei in Rom van ehren leiwen Paopst Affscheid nähmen willt.
Dat fierlicke Requiem för den storwen Paopst is an den tauken Saoterdag-Vörmdag up dei Stäe vör den Petersdom.

Dat Vatikan-Presseamt will bold ankünnigen, wanneiher dat Konklave för dei neie Paopstwaohl anfangen schall. Welkeen dat verfolgen will, kann ünner düt Link aaltied dat Aktuellste finnen: vaticannews.va.