De Windbüx

vun Henning Eggers


Wenn ut Wind Storm ward un de denn anfangt to küseln, denn hebbt wi en Tornado. Sowat hebbt wi in de Tieden vun'n Klimawannel al poormaal ok bi uns in'n Noorn beobacht': Dör warmeres Klima laadt sik de Atmosphäär mit mehr thermische Energie op, de Storms warrt stärker, un so en Windbüx, Windhose orr Tornado hett denn glieks veel Terstörenskraft. Aver dat Phänomen Windbüx hett dat ok al fröher bi uns geven. Düsse Geschicht heff ik ut miene egene Belewnis opschrewen. In düsse Tied heff ik miene Schooltied in Plön un miene Jugend in Aschbarg verbröcht.

"Windhose über dem Großen Plöner See am 02. August 1953". So stünn dat an 04. August 1953 in dat "Hamburger Abendblatt".


Langsam duukt de "Rüssel" ut de Wulken. Foto rikkerst/pixabay

Wo kümmt denn düsse Windbüx her? Wie kann dat denn angahn? De Wind wär all düchtig an't Blasen, un gegen Middag wär dat all en düchtigen Storm. He kääm ut de Richt vun Nord-Nord-West. Un ut den Storm wör nu all en Orkan! Dor, en Windbüx! — Dat güng allens so fix, över de Koppeln vun Heinrich Bank suust se över de Straat vun Aschbarg na Dersau un denn na den Aschbarger Park hento. Un denn düsse Huulton! Allens, wat nich fast wär, flöög dörch de Gegend — un mennigwat, dat egentlich fast wär, flöög ok. So üm de hunnert Meters südlich vun den Grafen-Friedhoff, wo de Familie vun Brockdorf-Ahlefeldt to Roh kaamen wär, kääm de heele Wucht vun de Natur to'n Insatz. Dreehunnert Meters breet wär de Schneis; dat baberste Waldstück legg so an sösstig Meters över den See, dor füng dat an un güng denn bargaf so an fiefhunnert Meters na den See to. De oolen Bööken un Eeken knicken af, as wärn dat Rietsticken, un de Dannen reeten mit samt de Wöddeln ut den Waldböön. Vun den Koppelknick bit an den See stünn nix mehr! Harrn dor de Riesen villicht ehre Knööv un Wut utlaten?


En Windhose op de Oostsee bedrauht twee Kriegsscheep. Foto yasioo/pixabay

Düsse Windbüx harr man nur wenige Minuten duuert, aver wo wär se afblewen? Se güng hoch na den Heben, över den Aschbarger Deel vun den Groten Plöner See henwech, ok över de Prinzeninsel na de Plöner Stadtbucht. Dor güng se wedder daal mit niege Knööv un heele Gewalt! Achter dat oole Fährhuus, wat fröher dat Institut för Hydrobiologie vun de Universität Kiel wär, dor wär de Haben vun den Plöner Segelvereen. An de Stege legen de Segelbööt. Legen! As de Windbüx se faat kreeg, dor wär dat Vergangenheit! De Segelbööt wörn dörch de Luft wirbelt un allens güng to Bruch!

De Windbüx tröck nu na de Rosenstraat to, dor wär en lütt Schipswarft, se faat dat heele Dack an un sett dat in en Stück wieder op de Wiesch bito enfach af! De Ünnerkunftsbarrack vun en Flüchtlingsfamilie wär nich so stabil, se füll enfach uteneen, allens leeg platt, dor wär keen Wahnen mehr möglich! Nu keeg de Windbüx enen Dreih un de Plöner Bahnhoff un all de Hüüser bilang harrn Schaden, denn de Dääker verlörn ehre Tegel un in de Goorns knicken de Obstbööm af. Dat seh ut as na en Bombenangriff in Krieg. De Schaden wär groot; aver nüms vun de Inwahners wären verletzt worden.


Schaden na en Windbüx. Foto skeeze/pixabay

So'n Ding will ik wohraftig nich nochmaal sehn. Ok sowat is en Grund, nochmaal nipp natodenken, wat wi nich doch lever mehr för uns' Klima doon schullen.


5.11.2017


na baven