Öber den Wien

vun Heinz Tiekötter

Wokeen hett denn nu den ersten Wien herstellt? Keen weet dat hüüt noch genau? Hebbt se eerst dat Getreide orrer de Wiendruven insammelt? Hett toeerst de Hunger or doch de Dost uns Vörfohren mehr tosett? Ik meen jo, bi miene Figur kann ik twee, dree Doog ohne Broot utkomen; man doch keen 24 Stünn ohne wat to drinken!

In'n Süüdkaukasus, dat is hüüt Georgien, hebbt se Wiengeschirr vun 5.800 v.Chr funnen. 2.000 Johr loter fungen de Ägypter dat Supen an.
Dat hett de olen Griechen keen Roh loten. Se hebbt notrocken un wiel se en Kolonie in Massalia (Marseille) harrn, gung dat dor wieder. Ik meen, bi dat Middelmeer-Klima stellt sik de Dost vun ganz alleen in. In de Gegend un bi dat Klima löppst du jümmers mit'n dreugen Knorpel rüm.

Ok de Perser nehmt för sik in Anspruch, de Erfinner vun'n Wien to sien. 2.500 v.Chr. weer Jamshid (spraken "Dschamschid") dor de Keunig. He harr siene Druven in Keller logert un hett se dor vergeten. De Druven fungen an to gären un to fulen. De Keunig hett dacht, dat is all Gift, un dat em de Opposischoon an't Ledder wull.

He harr dat ohnehen swoor; siene Keunigin harr fix Migräne un Keunig "Dschamschid" kunn er nich helpen. As sien Olsch meen, se kunn de Pien nich mehr uthollen, wull se sik mit dat Gift ut'n Keller dat Leben nehmen. Man de Wien hett ehr düchtig in Stimmung bröcht, un Kopppien harr se achteran ok nich mehr!

Djä, lebe Lüüd, nu weet ji, wat för'n ole Kulturform dat Supen is.
Wenn di nu een froogt: Wüllt wi wat för de Kultur moken orrer lebber 'n Lütten drinken? Öberlegg dat nich lang: Bi Kultur kriggst 'n Glas Wien; bi 'n Drinken gifft dat bloots Kööm un Beer!

Proost!