Horst Wernecke vertellt:

Dat Iesschapp in de Eer

Sodraad een vun Bargteheid in Richtung Bargfeld fohrt, kümmt een bi den Jersbeker Gootshoff an en Knüll vörbi. Up den raagt vun achtein hooge Kastangel- un Linnenboom schaddig verdeckt 'n lütt walmt Strohdack ut de Eer. Kunnst meist denken, dat is 'n oll germansch Gewees. Is dat avers nich! Is 'n oll Iesschapp, in dat de Gootsherrschaft jüm ehr Fleesch, Fisch un anner Futteraasch bit in den hogen Sommer köhl hollen dee.

De Butenwännen vun dat Köhlhuus sünd ut groote Findlinge tohopensett, de Binnenwannen ut Tegelsteen utmuurt. Dat 8 mol 16 Meter groote Rechteck is vun binnen in twee Kamern ünnerdeelt. In de achtere Kamer hebbts 'n 6 Meter deepen Trichter utbuddelt. Ünnen is de bi 3 Meter breet. De Wännen sünd mit Feldsteen utleggt, so kann dat Smöltwater vun de Iesschichten domerrn goot aflopen.

Snitt dör den Jersbeker Ieskeller. Klick op to'n Vergröttern!

Dat Ies wöör in Wintertieden ut 'n Hoffdiek röverhaalt un vörsichtig up den Bodden vun den Trichter leggt. Na 8 bit 9 Maanden weer vun dat Ies jümmers noch 'n Halfpart an Ort un Stell. Dat Willbratt, de Karpen un Slie wöörn eenendeels in Kummen blangen dat Ies leggt, annerndeels hebbt se de gröttsten Stücken an Querbalkens fasttütert un bit in de köhlige Luft över dat Ies daalhangen laten.

De Vörkamer, de achter den Ingang na Westen to liggt, hett 'n Steenfootbodden. Hier sünd de Melkprodukten so as Grasbotter, Kees un Suurmelk in Grapen, Kannen un Schötteln lagert worrn. Dat hier weer oftins wull ok de Köhlsteed för Beer un Wien.
Düsse Aart vun "Vörratswirtschaft" geev dat in Holsteen in dat 17. un 18. Johrhunnert bald up jeden Gootshoff. Just de "Barockminsch" wull dunn "swögen un swutschern" un dorbi natürlich to jedeen Johrstiet goot un rieklich to eten un to drinken hebben.