Ganz nie: Wodka Zelensky!

vun Behrend Böckmann

Dat is Marktwirtschaft, as man sei sik wünschen deit! 'N finnig schwiezer Ünnernähmer frünnt sik mit 'n ukrain'sche Modefru an un sei grünnen dat Ünnernähmen "DrinkForPeaceAG", dat von nu an den "Vodka Zelensky" in 'n Halfliterbuddel tau 39,99 schwiezer Franken (38,50 €) in'n Hannel bringt. Dat Etikett up'e Buddel hett 'n blåch-gälen Ünnergrund, up den Selenskyj grient. Teihn Franken gåhn dorvon as Spenn' inne Ukrain. Dissen Infall finnt ok Olena Selenska gaut, dei Fru von den einstigen Komedienmåker un hütigen böbelsten Kriegsmåker Wolodimir. Hei sülben hett noch nicks dortau secht. So ward ok dit Wodkaünnernähmen sien Geschicht hemm', as dat jede Kœm- orrer Bramwienbrennerie wull hett, dei 'n Wodka orrer Vodka up'n Markt bröcht, egål ob mit "W" orrer "V" schräben. Dei Würkung is ümmer deisülwig, denn dit "Wåder" hett ümmer twüschen 37,5 un 40 Purzent puren Alkohol un sticht bannig tau Kopp.

To Kopp sticht nich bloots dei Alkohol

Tauhus is dei Wodka dor, wo hüt noch dei "Lemberg-Wodka" inne Buurten steiht, von dor ut is hei nå'n Osten un nå'n Westen wannert un ward mål ut Tüffeln un mål ut Kuurn brennt. "Bison Grass Wodka", dei polnisch Zubrowka, ward all siet 600 Johr brennt. Die hütigen ok sihr bekannten polnischen Marken sünd dei Wodka "Belvedere" un dei Wodka "Chopin". Ut Moskau keem un kümmt dei "Stolitschnaja", dei af 1886 inne Kuurn-Brennerie von Iwan Smirnow — nå dei Oktoberrevolutschon 'n staatlich Brennerieünnnernähmen — brennt wür, sik hüt "Moskauer Destillerie Cristall" näumt un as weltgröttste Anlåch 15 Milljonen Ketongs à 12 Buddels up Reisen schickt. In'n britisch Brennerie ward hüt noch "Smirnoff-Vodka" måkt un dei "Stolitschnaya" wür all tau Sowjettieden gägen "Pepsiwåder" utschudert.

Hm, mal nadenken: So veel Pepsi orr so veel Wodka, wat is ungesunder?

Ob ut Tüffeln orrer Kuur brennt, dit "Wässerchen" wier ümmer glasklor un wür mierstendeils von Mannslüd mit 'n groten Döst ut'n Sto-Gramm-Glas (100 ml) drunken un ümmer mit por Tauprostwür, denn åhn disse Wür, so secht dei Russ', is dat Drinken 'n Superie.

Ok düütsche Hersteller hemm' sik wat infallen låten, denn näben dei Infuhr von Zubrowka, Stolitschnaja un Moskovskaya geef dat einfachen Wodka, œwer ok mål Puschkin Vodka, Smirnoff Vodka, Jelzin-Vodka, Beluga Vodka, Vodka Gorbatschow, Ladoga Vodka, Vodka Zarskoje, Lunikoff-Wodka... un äben ok den ostdüütschen Kristallwodka, dei as "Blåger Wörger" nich tau œwerdräpen wier un wägen dat blåge Etikett tau den Nåmen keem.

Nu gifft dat sogor all den 40-purzentigen düütschen "Abyme Bio Vodka" ut Berlin un wull noch ganz väle anner Wodkas. Un nich vergäten dörpen wi den lütten Schluck, den dei Jäger in'n Flachmann för den Fall bi sik hett, dat dat inne Nacht gor tau kolt ward.

Un dei Wodka hett äbenso sik as dei Wien in Lieder wedderfunnen. Erinnern willen wi an den Wodka-Fox "Giff mi den Wodka, Anuschka, giff mi em all, dei Wodka is fründlich, doch du büst so mall..." — n' Gassenhauger von 1954 sungen von Hans-Arno Simon (1920-1989). Un ok dei düütsche Sänger Hans Rippert (1931-2008), dei ünner den Nåmen Iwan Rebroff mit unverwesselbor Stimm' väle Lieder sungen hett, dei ut Russland keemen orrer dor spälten, — ok Iwan Rebroff süng 1969 "Schenk mi einen Wodka in" un dei Schluck süll nich taulütt sien, denn ierst 'n groter Schluck måkt froh...
Prösting, Trösting, na Sdarowje!

Dei Russen sallen sik œwer den "Selenskyj Vodka" lustig måken un hemm' as Gägenschlach 'n Vodka "Selenskyj sien Trånen" affüllt un in'n Hannel bröcht. Trånen gifft dat ja naug in'n Krieg...

Wodka ut Trånen? Krieg måkt wirklich zynisch...