Tortentrauma vun Meike Balzer-Fraun Güstern harrn wi en Inladen to en Kaffenamiddag bi de Landfruuns. Mien Plattmaatsche un ik schull'n so'n beten wat op Platt vörlesen. Weer schöön, de Fruuns hefft sik höögt, un wi weren tofreden mit uns Vörleespremieer. Mien Bregen is aver jümmers noch mit dat Tortenbuffet togang: 1974. Mien Mann un ik sünd jüst in uns nie'et Rehgenhuus introcken. As dat to de Tiet begäng weer, wull mien Swiegermudder mit ehr söven Naverschen op Besöök' kamen neeschieren' hefft se dat nich nöömt. In mien Rezeptsammeln Menu die schönsten Rezepte der Welt' funn ik dat Rezept för en Schwarzwälder Kirschtoort. Möörbodden, Schokolaadbiskuitbodden, Ahlbeerschelee, Karsbeerkompott, Karsbeerwater, veel Slagrahm un Borkenschokolaad. (Wat dat de woll noch gifft?)
Mit mien nie'e Kökenmaschien un den Sprüttbüdel heff ik allens fein kloorkregen. So en richtig dicke Slagrahmtoort mit veer Schichten, de man graad so in't Köhlschapp pass. De
Tapezeerdisch mit Oma ehr olet wittet Linnendook un mit mien Utstüergeschirr
seeg smuck ut, un op uns gröne Klappstöhl ut'n Bumarkt
kunnen wi fein sitten. För de Fruunslüüd harrn se
man wat grötter un weker sien kunnt. Klock dree. Mien Mann harr nu to doon, söven Rükelbüsch
in't Water to kriegen blots nich twee in een Vaas, dat höört
sik nich! (Desterwegen geev dat also all de Vasen to Hochtiet.) Een vun de eersten richtig warmen Sommerdaag. As wi endlich to Disch gungen, weren de böversten Schichten vun all de twölf Stücken vun de dicke Toort utenanner rutscht un legen breet un platt blangen de Tortenplatt op dat Dischdook. Wo dat den Namiddag wiedergung, is ut mien Bregen verswunnen "verdrängt" heet dat ja woll.
1994. Mien Süsterdeern wünsch sik to ehren Geboortsdag
en Schoko-Beren-Toort. Weer snutenlecker, un ditmal harr ok ik en kommodigen Namiddag. 11.4.2024
|