 |
|
Schauster Bünnings Schuufkoor vun Günter Weber
So af un tau möötst ja ok dien eigen Gerätschap heil måken. Mien Schuufkoor is binah föftig Johr olt. Ik woor vun de Zollschaul Gandersheim na hier henschickt, üm Schmuggler tau griepen. Wi kregen ein fein Hus as Dienstwohnung mit Goorn. Süh, un dor heb ik mi Schüpp, Spåden, Fork, Hack un ok de Schuufkoor tauleggt. Wenn öller büst, föllt di jümmer wat ut de Jugendtied in. Wat dat mit Schauster Karl Bünning to daun hett? Bünning weer de, de in Klempenow an'e Tollense na den Krieg in die föftiger Johr Schauh heilmaakt hett, de normaal gor nich mehr heilmaakt warden kunnen. Ok Fautballschauh? Ja, solk Klutenpedder hett hei heilmaakt.
Dat will ik nu vertellen. Karl Bünning weer en Orginal. Hei harr en Witfru heiraat, de en so nöömte "Kriegstrauung" achter sik harr. Die Frugenslüüd güngen met eenen Suldaten to't Standesamt, den sei meistens man bloots eenmaal seihn hebbt. Denn weer en Kind ünnerwegens, vun wokeen ok jümmer. Fernhochtiet geev dat ok. De Suldat weer op de Krim un de Fruu in Mekelbörg. Die Fruu hett Frieda heiten. Ehr Mann weer ja nu in'n Krieg bleven und sei heiraat man nu den Schauster Karl Bünning. Also, Karl weer en Orginal. Hei hööl de Minschen to Narren un vertellte mit dat ierrnsthafteste Gesicht Dönekens. Lachen weer bi ehm ümmer anseggt. Sünndags Klock teihn güng dat jümmer hen na den Kraug bi Willerts. As Karl nu nich üm Klock twölf tau Huus weer, güng Frieda los. Ganz Klempenow wachten all. Frieda harr en lütten Stock in'e Hand und tröög mit so en Schuufkoor vör den Kraug. As en Wraakengel schööt sei in de Kneip. Wi Jungs stünnen
buten un hörten denn: Frieda greep Korl ünner de Arm un packte ehm up de Schufkor. Dorbi kneep hei uns een Oog un grinste. Sei bleev man an't Schandalen. Bit op ehren Hoff. Korl keem ut de Schuufkoor in de gaude Stuuv. Sünndags wöör dor eten. Hei treckte sik de ole Büx an, nähm sien Angelruut, güng achtern rut na de Tollense. Frieda weer jümmer noch an't Blubbern.
So Enn Mai bit Beginn Juli güng dat op den Döbel. Ik bün veel mit ehm ünnerwegens weest. Dor angelten wi mit Goldkäfer as Köder, de ik all sammelt harr. An'e Tollense maakten wi de Angeln klor. Denn leggte Corl Bünning sik in dat hoge Gras. Dat Beer vun den Vörmeddag müsst "in Rauh" afbuut warden. — Ik heff so mennigeen Döbel alleen ut die Tollense hålt. Wi hebbt den Fisch jümmer deilt.
Mien Fautballschauh hett Schauster oarl Bünning mi jümmer heilmååkt, as ik bi "Traktor Ollentreptow" op den "Klosterbarg" speelt heff.
26.12.13 |
