Wiehnachten — allein tauhuus

van Ludgerd Lüske

Dei olde Schaulmester, wi kennt üm gaut, is heil allennig up dei Welt.

Hilligaobend kreeg miene Mauder mi un use Kinnerwicht mit Wiehnachts-Beschüt up den Padd nao den olden Mann. Wi drögen ein grotet Paket mit bunte Stricks doran. Up dei reine fägte Treppen steegen wi nao baoben un kloppden an dei Dörn. Dei güng sachte aopen, ick müg bold nich rin gaohn äöwer den fienen Teppich. Wi säen üm dei Greuten van use Mauder un läen dat bunte Paket up den Dischk.

In siene Staobend stünnen rund üm einen hogen Speegel luuter schwarte Scherenbiller, sowat har ick noch nich seihn. Dei olde Schaulmester frög mi, off ick mi up Wiehnachten fraien dö. Ick nappkoppde.
"Wor schall denn Ehr Wiehnachtsboom dit Johr staohn?"
"Nee, ick haol mi kienen, ick blief in'n Huuse."
Don wörd ick orig truurig bi den Gedanken an ein Wiehnachten allennig tauhuus. Disse Staobend mit dei schwarten Biller, dei stillen Bäuker un dat losstaohn Sofa löt troostlos un verlaoten. Ick hüllt mienen Kopp daol un löt dei Traonen kullern.

Dei olde Mann trück mi hoch up siene Kneie un drückde sien Gesicht an mien't, hei säe liese: "Du büs ein'n besten Jung'."

Läöter, tauhuus, vertellde use Kinnerwicht miene Mauder, dat ick orig huult har.
"Jao, dat häbb ick, wiel nümms den olden Schaulmester beseuken dait, nich maol an'n Hilligaobend."
An dissen Dag aohnde ick, dat et einsaome Menschken giff, dat et allennig tau Huus schwor is, sünners an dei Wiehnachtsdaoge.

Miene Mauder streek mi schachte äöwer't Hoor un säe: "Vellicht mag hei vanaobend bi us wän? Gaoht gawe hen un fraogt üm!" Leiwer dön wi nicks!

Läöter an' Aobend kloppde et bi us vörsichtig an'ne Huusdörn. Dei olde Schaulmester was wohrhaft dor. Wi nöhmen üm mit in dei Wiehnachts-Staobend. Use Wiehnachtsboom un sünners use Klavier gefüllen üm. Glieks seet hei vör dat Instrument un wi hörden den Klavierklang un süngen mit: "Stille Nacht, hillge Nacht..."

Noch Johre läöter denk ick gern an'n Hilligaobend an den Schaulmester sien Musik-Geschenk in use Wiehnachts-Staobend.