Fiete Lüttenhus wördigt Fritz Lau


Friedrich Schnoor (1879 — 1966) — sien Schrieversnaam weer Fiete Lüttenhus — hett op Platt Gedichten un Geschichten schreven un reziteert. Sien Söhn Freddy Schnoor hett uns en ganz Koppel Texten ut sien Vadders Nalaat tostüürt.

Fritz Lau (1872 - 1966) weer en plattdüütschen Heimatdichter. De beiden Mannslüüd verbunn en faste Fründschap. Se stürven kort na'nanner un sünd 2016 so beid 50 Johr dood. Nadem wi annerletzt an Friedrich Schnoors Doodsdag erinnert hebbt, laat wi nu dör sien Stimm sienen Fründ wördigen, de an'n 5.Juli stürv.


Riemel vun Fritz Lau. Klick op to'n Vergröttern!

Den'n Oltmeister von de plattdütschen Dichters
Fritz Lau to sien fiefunsöbendig-jährigen Geburtsdag
an'n teinten August 1947


Fritz Lau. Klick op to'n Vergröttern!

In slimme Tied un sweere Stunn
Hebbt Trost wi in Dien Böker funn,
Dat uns dat Leben wör nich to Qual,
Dat dankt wi Di veel dusendmol!
Un hüt, wo den'n de Dag nu dor
Wo du büst fiefundsöbendig Johr
Dor wölt wi uns bedanken gau
Un wünscht von Hadden Di, Fritz Lau,
Veel Glück, veel Glück op allen Wegen.
De Du de "Achtzig" geihst entgegen.
Bliew uns gesund un bi Humor,
Holl frisch un froh uns Di noch mennig Johr!
Wo ümmer Du för streewst un leewst
Dat warr't ok denn nich ünner gohn,
Wenn noch so bitterbeus de Tied,
As wi se dörchmokt hebbt bit hüt.
Uns' Plattdütsch, dat ward wiederleben,
Dor wölt mit Di wi All' för streben!
Dat's för Dien Wark un för Dien Dohn
Doch woll de allerriekste Lohn.
Uns Haddenswunsch stiggt bit no'n Heben:
"Geew Gott Di noch een langes Leben!"

Friedrich Schnoor, 1947


Postkoort an Friedrich Schnoor: Fritz Laus Stempel is noch in schicke Jugendstil-Lettern.
Klick op to'n Vergröttern!


Fritz Laus Ünnerschrift op en Breef an Friedrich Schnoor.
Klick op to'n Vergröttern!


Fritz Lau beschrifft sien Fier to'n 90. Bortsdag. Klick op to'n Vergröttern!

Fritz Lau to'n 80.Gebortsdag

Twee Genien,de stünn vör achtig Johr
An Diene Weeg: de Kunst un de Humor.
Ehr Harbarg bleew dien Hatt un Dien Gemeut,
Se streuten Di so mennig Bloom un Bleut
Op Dienen Lebenswegg, denn Du verstunnst
Veel Schöns to schaffen dörch Dien grote Kunst.
De Dichtkunst, de as Gottesgoow Di todeel,
Hett Dusende erquickt an Hatt un Seel,
Un as een'n schön'n roden Fooden win'nd
Sick de Humor, dat hattlich Sünn'kind
Dörch diene lebensvulln Poesien.
Lot denn von Hatten grotuleert Di sien!
Erholl un's Herrgott Di noch veele Johr
Dien Dichtergoow un den'n Humor.
Wenn ok Dien Lebenssünn'bald geiht to Rüst,
Schön ist, wenn's gülln noch de Wolken küßt,
Un lang'n noch ward ehr lüchend Wedderschien
De dankboor Nohwelt in'd Gedächnis sien.

Friedrich Schnoor 1952


Breef vun Fritz Lau an Friedrich Schnoor. Hoochdüütsch schreven se ja doch...
Klick op to'n Vergröttern!


Översicht över uns Bidrääg vun un över Fiete Lüttenhus
10.7.2016


na baven