Fiete Lüttenhus: Abendausgabe Fremdenblatt

Friedrich Schnoor (1879 — 1966) — sien Schrieversnaam weer Fiete Lüttenhus — hett op Platt Gedichten un Geschichten schreven un reziteert. Sien Söhn Freddy Schnoor hett uns en ganz Koppel Texten ut sien Vadders Nalaat tostüürt. Düsse Riemel erinnert an een vun de Vörlöpers vun't "Hamburger Abendblatt", dat so nöömte "Fremdenblatt".

Grote Bleeken, Strotenlarm.
Henn un her de Minschenswarm.
Heur mol to, wat is denn dat?
„Abendausgabe Frem'mblatt!”

Dröben in de Hüsereck
Sitt Fro Smidt in Stoff un Dreck,
Is vun Regen all ganz natt,
„Abendausgabe Frem'mblatt!“

Veerdig Johr all sitt se dor,
Fooln in'd Gesich un gries dat Hoor.
Mennig Obend swör dat Hatt.
„Abendausgabe Frem'mblatt!“

„Abendausgabe..!" — „Nobend, Froo Smidt,
Geew mi gau'n Frem'mblatt mit.“
„Jo, Herr. — Nee, wat regent dat!
Abendausgabe Frem'mblatt!“

„'n Billerbogen giwwt hüt to!“
„Kiek, dat is mol nett, lütt Froo."
„Kupfertiefdruck nennt se dat!
Abendausgabe Frem'mblatt!”

„Neen Roman fangt ok hüt an.
Koom'n Se jeden Obend ran?
Jo? Na scheun! Ward trüchleggt, wat?
Abendausgabe Frem'mblatt!“

Bit Klock elben bliew ick bi,
Un denn ward dat Tied för mi,
Heff jo noch keen Obendbrot hatt,
„Abendausgabe Frem'mblatt!“

„Na, denn man adschüß, lütt Froo.“
Un se singt noch ümmerto,
Bit de Nach kummt düsterswatt:
„Abendausgabe Frem'mblatt!“