Seemannsgarn:
Indoneesche Hülpsseelüüd un Lucky Strike

vun Günter Sohnemann


In'n eersten Haven kreeg de Mannschap vun de Darmstadt veertig Indonesier as Verstärkung. Mit de Lü woor ok en grote Hieve Stauholt an Bord sett. Dorvun hebbt sik de "Hülpsseelüüd" in't Kabelgatt ehr Hotel mit veertig Betten buut. Dat weer ehr Tohuus, wieldess wi na meistto all indoneesche Havenstäder ünnerwegens weern.

Ok düsse Minschen harrn ehr Malesch mit'nanner. Ik heff sehn, wo sik een mit'n Metz op en Ahnungslosen störten dä. Avers de Landslü, de ümrüm togang weern, kennen dat al. In en ganzen Koppel kemen se op den Metzensteker dal un hebbt Legeres verhinnert. — Tweemaal heff ik dat mitbeleevt. In'n neegsten Haven hebbt düsse Amoklöpers denn de Rückreis antreden.

In Indonesien blöh de Swatthannel mit Zigaretten. "Lucky Strike" weer de Währung. Dat Land harr sik noch nich so recht funnen, nadem dat de Hollänners as Koloniaalmacht dat Land verlaten harrn. Dat weer in den Kolen Krieg mang Oost un West sliddert.

Ik heff Warenlevern ut de DDR in'n Haven vun Djakarta, t.B. en huushogen Barg vun opstapelte Zementsäck, keen Afdecken weer doröver — dat weer al tominnst twee Monsunperioden utsett west. En Denkmaal vun'e Völkerfründschap.

Nu bün ik wedder afkamen vun wat ik vertellen wull: den Lucky-Strike-Swatthannel.

Minschen maakt mennig Saken op de Welt, dat mi de Mund vör Staunen apenstahn blifft.

Also: En Havenarbeider in Djakarta verdeent in een Schicht tachtig Rupien. Een Buddel Beer in de Havenkneipen kost hunnerttwintig Rupien. Een Stang Lucky Strike (zollfrie bi uns an Bord), also tweehunnert Zigaretten, kost veer DM.

Op de Reede vör den Haven Djakarta hebbt wi twee Daag ankert. Dor sünd bi Nacht mit ehrn Eenboom de Zigarettensmugglers ut de Dunkelheit opduukt. Liesen reep dat de Bordwand hooch: "Lucky Strike, Lucky Strike!"

Dat weer dat Signaal; künnige Maten harrn uns dorop vörbereidt. Nu güng dat Feilschen an: Wo veel Rupien för een Stang Lucky Strike? — In de Regel geev dat dorför so üm de achthunnert bet Dusend Rupien.
"Ik warr verrückt", sä en ole Matroos, "de geevt vundaag dusendachthunnert Rupien!"

Nu leet ik as de annern ok en Lien in den Eenboom daal; dor bummel een en Flechtkorv an, den heff ik rophievt un dä eerstmal twee Stangen Lucky Strike rin. Denn den Korv wedder daallaten in de Düüsternis. — Op den Rüchweg legen in mien Korv dreedusendsösshunnert Rupien.
Fix noch de annern Zigarettenstangen daallaten, un ik weer för indoneessche Begrepen en rieke Mann.

As en Spöök weern de Boote in de Düüsternis verswunnen.


12.12.2021

 


na baven