Heuhner, Aanten un Kaninken

vun Silke Frakstein

Dat gifft ja nun twee Promis (weiblich), de Heuhner hebbt. De Een midden in de Stadt mit'n schalldichten Stall un de Anner buten op Land in de Neegte vun de Elv. Barbara Schöneberger un Judith Rakers hebbt dat mediaal vermellt, dat se nu ok Heuhnerfans sünd.

Dat is jo nu ganz wat Besünners. Un de "strahlende Schönheit" kümmt vun dat wunnerbore Landleben. Un in dat Book, wat ganz tofällig op'n Markt kümmt, kannst dat allens nolesen.

Wi harrn 1950 ok Heuhner. Dree witte Legehennen: Zarah Leander, Marlene Dietrich un Greta Garbo.

Witte Legehennen sünd bannig fienföhlig, un jümmers in'n Winter weern se verköhlt. Un denn güng dat Drama los. Rin in den Stall un de Heuhner griepen!

Dat seggt sik so licht. Miene Öllern weern jo Stadtkinner un nich vun't Land.
Ober uns Nober ut Ostpreußen hett hulpen. —
Un denn de Heuhner op'n Schoot un "den Hals ausgepinselt". O Mann, wat'n Opstand!

No een Tiet kregen de Domen denn ok enen "männlichen Begleiter", also enen Gockel. Un denn hebbt wi Eier eten, so as de Promis hüüt. Ober wi kregen Salmonellenvergiftung.

Stall ut dat Johr 1945. Foto: Mark Heinen

Af un an sünd de Heuhner utbüxt. De Stall weer so'n beten pulterig un Zarah Leander mit Anhang weern "in Nachbars Garten". Wenn de Küken dor weern un buten weer dat noch to koolt, kemen de Lütten in'n Kohlenkassen ünnern Herd.
Loter kemen to de Heuhner noch Muckis un Aanten dorto.
De Aanten harrn de Boodwann ünner enen Plummboom, un vun den veelen Matsch vun de Aanten seet de Boom vull Lüüs.
Also, Aanten to Wiehnacht op'n Töller.

Mit de lütten Muckis hebbt wi speelt. Hebbt Foder sammelt un to Wiehnacht weern se op eenmol nich mehr dor. Un an de Stalldör hung so'n nackert Deert un Opa ut Ostpreußen hett mit de Rasierkling dat Fell ganz sauber kratzt.
Dat Fell weer för uns Puschen.

Uns Goorn weer de Hauptlieferant, direkt ohn Google orrer Lieferando, mit veel Arbeit und veel Vitamine. Un de besten Tomaten harrn wi, de Lüüd ut de Stadt. Dat Geheemnis? De Köpp vun'n Fisch ünner de Planten in de Eer.

Un nu, leeve Lüüd, weet ji ok, woher mien Schönheit kümmt.

Meine Oma fährt im Hühnerstall Motorrad, Motorrad……….
Meine Oma hat 'nen Nachttopf mit Beleuchtung…….
Meine Oma hat im Strumpfband 'nen Revolver....

Nu segg noch mal eins, is dat nich en kaptaale Oma?!