Den Minschen ward hüt in uns digitale Welt väl afverlangt, un hei hett lihrnt, dormit ümtaugåhn, un denkt gor nich mihr doran, dat sik uns Vöröllern in lege Tieden nich dat leisten künnen, wat sik hüt von sülben versteiht. Un denn wür dat Läben ümmer komodiger: åhn elektrisch Licht, Wåder ut 'n Håhn, Käuhlschapp, Klœnkist un Klappräkner mit Highspeed-Internet is dat Läben nich mihr vörstellbor; man flücht nå London orrer Paris taun Schoppen, måkt tweimål in'n Johr 'n Krüzfohrt, gönnt sik Dach för Dach 127 l Wåder, bringt as Mihrheit mihr Fleisch up'n Disch as nödig un höllt dei Veganer un Vegetarier inne Minnerheit för döschig. Sett't 'n Beläwnis uns ein „P“ vör, dat ein un anner tau ünnerlåten orrer dei ein un anner Wirtschaft kann nich mihr wirtschaften, äbenso schluten hier un dor Schlåphüs un Höker nich mihr dei Dören up —— denn fangt dei digitale Minsch an tau wunnern.

Taunåhmen hett för Oltjohrsabend dat Böllern. Dei iersten Böllerkunnen hemm' sik all inne Nacht anstellt, dormit's ornlich tauschlågen kœnen, wenn dei Dör upgeiht. Un männigein lecht mihr hen, as 'n armer Schlucker noch an Börgergeld in'n Månd kricht. Twüschen sœbenhunnert un dusend Euros warden utgäben, un dei, dei dat Geld so inne Luft jågen, dei meinen ok, dat dat ja blot an einen Åbend passiert un för dei Ümwelt nich so lech is as dei Füer in Gaza orrer inne Ukrain.

Dei Böllerhöker freugen sik, denn dit Johr künnt passieren, dat Böller för mihr as 200 Milljonen Euros an'n Mann bröcht warden. Œwer wecker denkt doran, dat dörch dei Böllerie rund 2.400 Tunnen CO2 un rund 2.050 Tunnen Fienstoff (Feinstaub) so mir nix dir nix inne Luft œwergåhn, dat inne groten Städte bet tau 200 Tunnen Böllermüll för dei Statdreinigung anfallen, dat allein in Berlin 3000 Schutzmänner un 1500 Helpers von't TH, DRK un noch anner Inrichtungen Deinst hemm'? Un dor sünd noch dei besten Frünn von'n Minschen, dei Katten un Hunn, dei bi jeden Böllerschlach dat Bäwern kriegen un sik verkrupen.

Wenn dor dat Geschäft nich wier, künn man ja dat ganze Land böllerfrie hollen. Låben möt 'n dei Burmeistersch von Magdeburg, dei ehr Inwåhners mit Blick up den Anschlach up'n Wihnachtsmarkt bäden deit, von 'n Böllerie aftauseihn. Hentau kümmt noch, dat tau Middernacht dei ein un anner all so väl inne Kron hett, sik nich wiet nauch vonne Böller uphöllt un denn inne Notupnåhm in't Sükenhus lannt.

Besinnen wi uns doch mål wedder up Tieden, as dat an'n Oltjohrsåbend Punsch geef, an'n Dannenbom noch eins dei Lichten anstäkt würn un ihrer as dat sei rünnerbrennt wiern, würn por Wunnerstieken ranhollen. Twüschendörch wür „Minsch-arger-di-nich“ orrer „Mœhl“ spält un ut Fritzing Reuter orrer Rudolf Tarnow sien Riemels wat vörläst — un wenn dei Wandklock twölf schlööch, denn keemen Pannkauken mit Œwerraschungsinlågen up'n Disch, Luftschlangen würn schmäten, Knallbonbon treckt un dei Sprüch ut't Binnelste taun Besten gäben. Un wenn't denn noch so keem, denn wür dei Nåwerslüd "Prosit Niejohr" tauraupen — un denn güng't inne Puuch. Un so as dunnemåls künn dei Oltjohrsåbend ok taukünftig in'n komodig Runn' aflopen un åhn groten Uplop för 'n besinnlich un liekers gaude Stimmung sorgen.

Wi wennen so väl in uns Land, worüm nich ok 'n Böllerwenn verkünnen un dornå hanneln?