Kennt Se den Freedhoff in Hamborg-Ohlsdorf? vun Gertrud Everding Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
|
|||
He is mit siene 400 ha de gröttste Freedhoff op uns Eer, un ik meen, ok de schöönste. Dorüm harrn wi uns denn mit veer Frünnen op'n Weg maakt. Vörmeddag al weer dat bi 30 Grad warm, aver dat weer keen Hindernis för uns.
Wi wüllt de greune Natuur, den Sommer un den scheunen Friedhoff ankieken. Nee, nich bloots lopen! Dat is to anstrengen bi düsse Hitt.
Ik harr mien Auto dorbi. Dree Fruunslüüd un een Mann, dat weer en ideale Gesellschap. Stück fohrn, Stück lopen, Stück fohrn, wedder Stück lopen, so weer dat kommodig. Dat grote Bombenopper-Mahnmal för de 40.000 Doden von de Gomorrha-Angriffe Juli un August 1943 weer de eerste Statschoon. En 5 Meter hogen Quader ut Sandsteen un binnen en Bild, ok in Sandsteen,
ut de ole Tiet, as de greek'sche Fährmann Charon noch över
den Acheron in den Hades, de Dodenwelt, fohrn is. Hier
köönt Se dat denn, wenn Se dat wullt, noch mal nalesen.
Dat weer hier dat vulle Leven! Een Gesnater un Flünkenslahn! Ik weet noch, in Sommer, wenn de lütten Göös dat Flegen lehrt, denn kannst hier bloots so slieken mit dien Auto. Dat is een Flegen un Fladdern, as in Fuhlsbüttel mit de Fleegtüüch op de Landebahn.
Dat güng nu na Kapell 10. Goor nich lang, denn weer dat schafft. Överall weer de Rhododendron an't Blöhn. Wi weern rein ut de Tüüt! So 5-6 Meter hooch weern de Büschen.
Kapelle 8! Utstiegen! Hier is dat Kolumbarium! En grote Kapell för Truuerfiern. Aver allens stunn vull mit Glasvitrinen, mit Namens anschreven, un Urnen överall Urnen staatsch un opwennig! Richtig fierlich! Grootoordig, so'n Anblick! Aver ok düster. Na ja, wokeen dat mag, de mag dat mögen. Is ok nich ganz billig! Aver de Urne mutt denn nich in de Eer rin.
Wi wullt toletzt partout noch na de Dichtereck kieken. Dorbi hung uns al ganz scheun de Tung ut'n Hals. Dat güng nu bargop un bargdal, wi wullt al opgeven. Un denn harrn wi dat doch noch funnen! Hier legen all de Prominenten nich allens Dichter, aver doch all ut dat noorddüütsche Literatur- un Kulturleven: Edgar Bessen, Fritz Stavenhagen, Familie Voscherau (Kulturleven? Ja, dat is en Schauspelerfamilje!), Richard Ohnsorg, de olle Henry Vahl un siene Familje un ganz wichtig ok Wolfgang Borchert.
Mannomann, dat weer'n Ding, wi harrn dat wohrhaftig funnen! Bi Wolfgang Borchert weer sogoor en luurlüttjen ganz frischen Blomenstruuß op dat Graff! Wokeen den woll henleggt harr?
Bald op alle veer Fööt sünd wi denn na unser Auto
torüch. Düchtig kaputt weern wi un döstig
as'n Kamel na 40 Daag Wööstentour. Gahn Se ok maal hen! Is wunnerscheun dor! |
|||
28.6.2015 |