Mist op'n Plöner See

vun Henning Eggers

Wat hett dat Slott Plön mit dat Gut Nehmten un de Seefohrt to doon? Dat is en egenartig Geschicht un keene Sage, un se is wirklich passeert!

Ingang na Nehmten

Na den 2. Weltkrieg leeg de düütsche Hannelsflott an Bööhn un dat geev keene niee utbildt Seelüüd. De Lübecker Reeder Weidemann un ok Hamborger Reeder, ü.a. Ferdinand Laeisz, setten sik dorför in, eene Seefohrtsschool to grünnen; de Graf Plessen-Kronstern ut Nehmten stell sien Slott an Groten Plöner See to Verfügung. Otto Hahn, de Grünner vun dat Internat Salem, käm ut Schottland un hett de School mit opbuut. So kämen ut Düütschland un Britannien 80 Kadetten na Nehmten för de Utbillung för Seeoffziere! So wär Slott Nehmten vun Fröhjohr 1951 bit Sommer 1952 de Seefohrtsschool, darnah wöör ümtrocken na den Priwall in Travemünn.

Dat wär in Harvst 1951, to de Tied, as in Nehmten de ersten Kadetten an de Seefohrtsschool utbildt wörn. De Hamborger Reeder kemen övereen, wenn Seelüüd utbild ward, denn mööt se ok dat nödigst Handwarkstüch hebben. So wörn denn ok noch intakte Reddungsbööt na Nehmten op den Groten Plöner See bröcht. Se wörn an't Ufer vun dat Gut antüddert, so dat de Kadetten, jümmer wenn de Ünnerricht dat verlangte, mit de Bööt öven kunnen.

Slott Nehmten hüüt

In dat Plöner Slott wär jo dat Internat vun dat Plöner Gymnasium, wo jo ok de Schölers slopen dään. De Internatler harrn an dat Ufer vun de Prinzeninsel en Bootshuus, wo ok Segeljollen legen. Dat inspireer de Jungs un se setten Segel un seilten över den See na Nehmten, dor legen de Rettungsbööt un nichmol en Wach wär dorbi! De Bööt aftüddert un denn in de Richt op Bosau in Fohrt bröcht!

De grote Hoffanlaag vun Nehmten

An annern morgen bi den Appell op den Slotthoff marken denn de Kadetten un Utbillers, dat de Rettungsbööt meern op den See föhrerlos rümdümpelten. En Katastoph! Wer wär schüllig? Wer harr slopen orrer weer sien Plicht nich nakoomen? Wonehm wär de Stegwach west? Fortsens kääm de Gedanke, dann kunnen bloots de Plöner Internatler west sien!
Dat schreeg na Rache! En Kriegsraat wör inberopen, ok de Graf vun Plessen-Kronstern wär dorbi! 80 Kadetten wulln de Internatler en groten Schrecken injagen!
Tonächst wör en Spion na dat Slott schickt, he schull de Binnenrüüms un dat Ümtoo utkieken. Ünnen an't Seeufer, dor, wo ok de Tunnel ünner de Isenbohn bi de Slottgornerie dörchgüng un de Wech an de Kommandeursvilla vörbi güng, kääm man an den Slottbarg (Fruunsbarg) direktemang.

Slott Plön

Nu güng dat los! Graf Plessen stell en Ledderwagen to Verfügung, de wör demontiert un in de Bööt verstaut, ok Lappens to'n Ümwickeln vun de Rööd. Nu noch schön kotten Mischmist vun Köh un Swien in Säck affüllt; wat för en Gestank! Ok rin in en Boot! Nu wör de Wetterbericht inhaalt, dat Wetter wär günstig un de Wind wär inslapen. Rechtiedig wär de Spion in dat Slott inslüüst un he harr sik versteeken — vörher noch en Slötel klaut.

Över den Plöner See

De Armada start' vun Nehmten na Plön un dat fahle Mondlicht belücht de Szene. De Bööt mit ehre Mannschop leggten an an'n Strandwech. Starke Arms vun de Kadetten drägen allens, ok den Mist rop na dat Slott. Vun Geisterhand opent ehr Kamerad de Döör, un nu güng allens fix na ehren Plan. In Rittersaal, wo de Internatler jümmer fröhstücken, stünn nu en Ledderwogen mit frische Landluft vun den Mist! Ganz liesen, so as se komen wärn, verswinnen de Kadetten wedder, ehr'n Spion nähmen se ok mit trüch. In Nehmten wörn alle mit groot Hallo begrööt!

Un in dat Plöner Slott? Morgens, as de Pedell mit siene Hölpers dat Fröhstück vörbereiden wull, dor erschreckt se bannig vun den förchterlichen Gestank! Heimleitung, Lehrer, Erzieher un Schöler wärn in helle Opregung! De Direktor vun't Gymnasium, Dr. Schmidt, gäv de Parole rut, alle schullen stillswiegen, dormit de Plöner un de Zeitungen nix mitkriegen schullen! Aver dat sicker ganz fix dörch, un meddags stünn dat all in dat "Plöner Tageblatt", un wie en Loopfüer güng dat dörch Plön un ümto! As dat passeer, güng ik sülven noch in Plön op de "Städtische Realschool Plön" to'n Ünnerricht un miene Mitschölerin Rosi Andrischocks Vadder wär de Börgermeester vun de Stadt Plön, dor kregen wi jümmer uns Nieigkeiten mit.

Düsse Rachefeldtoog wär lange Tied noch Dagessnack bi de Inwahners vun Plön. De Afordnungen vun beide Internate Nehmten un Plön verhanneln invernehmlich miteenanner, un so wören düsse Streiche "ad acta" leggt.