vun Behrend Böckmann

Na den Sünnenfall in't Paradies ward Eva Mudder von Kain un Abel. Un siet disse Tiet hett sik nix doran ännert, dat dei Fru dei Kinner kriecht, dei lütten Wörms an'n Bossen lecht un dorför bäten Ihrung verdeint.

Sülfst inne antike Götterwelt wür all Rhea, dei Göttin för Fruchtborkeit, as Mudder von Zeus, Poseidon un noch vier anner Götterkinner verihrt. Inne niege Tiet hett denn dei Amerikanerin Ann Maria Reeves Jarvis (1832-1905) Anlop taun Mudderdach nåhmen. As Fru von 'n Preister süht sei Kinner mit Krankheiten upwassen un beläwt, dat Mudders ut'e Nord- un Südstaaten in'n Amerikanschen Börgerkrieg (1861 bis 1865) dei Tranen leepen, wenn ehr Soehns as Krüppel orrer gor nich ut'n Krieg nah Hus taurüchkeemen. Üm dit Älend tau linnern, grünnt sei all 1865 denn „Mother's Friendship Day“ un ward dormit tau dei Mudder von'n Mudderdach.

Twei Johr na den Dod von Ann Maria Reeves Jarvis keem ehr Dochter Anna Marie Jarvis (1864-1948) up den Infall, in ehr Medthodistenkark an'n 12. Maimand 1907 'n Ihrengottesdeinst för ehr Mudder aftauhollen. Dat hett ehr Maud måkt un 1908 geef dat den iersten Mudderdachsgottsdeinst. As Teiken för dei Ihrung von all dei Mudders hett s' 500 witte Näglein (Nelken) aflecht. In anner Johr geef dat mihr as 10.000 Näglein, rode för dei läwenden Mudders un witte för all, dei nich mihr ünner dei Läbenden wiern. Un so hemm' dei Methodisten, dei ehr Läben mihr anne Bibel utrichten as anner evangeelsche Christen, all 1909 in 45 Staaten den Mudderdach fiert. Un sei hemm' dörch Petitschonen Woodrow Wilson (1856-1924) — von 1913-1921 dei 28. Präsident vonne USA — dorhen bröcht, dat dei Kongress den 8. Maimand 1914 tau natschonalen Fieerdach utreep. Von nu an geef dat den Mudderdach inne Staaten, un hei keem 1927 inne Schwiez, 1918 in Finnland un Norwegen, 1919 in Schweden, 1923 in Düütschland un 1924 in Oesterriek as Fieerdach up.

In Düütschland wier von dor an dei tweite Sünndach in'n Maimand dei Mudderdach; un ut dei Blaumen, dei einst Anna Jarvis in'n Gottsdeinst verdeilt harr, wür dei Struz för dei Mudder un dat Geschäft för den Blaumenhöker. Dei Floristenverband sett't sogor dörch, dat Blaumenhöker an'n Muderdachssünndach Blaumen verköpen dörpen. Dat wier nich ümmer so, oewer hüt kann wedder jeder Minsch an'n tweiten Sünndach in'n Maimand för sien Mudder 'n frischen Struz Blaumen köpen.