Nu, wo ik olt ward, hemm' mien Hor dei witte Farf för olle witte Mannslüd annåhmen un wenn nix mihr wassen will, so warden doch denn Schnack nå dei Uhren in't Öller grötter, ganz in'n Gägendeil taun Rest von'n Lief. Un dat seet mi nu in 'n Nacht as 'n Alp up'e Bost. Denn in'n Drom leet Mudder mi rut up'e Dörpstråt un glieks keemen anner Jungs up mi tau un säden: "Nå Glühbirne, du Sägeluhr, täuw, di warden wi mål düchtig dörcheiern..."

Dat harr 'k nu, mien Mudder höll mi för klauk, för einen, den nich dei Dummheit ut'e Ogen lüchten däd, un dei Dörpjungs harrn ehren Spåß, mi wägen mien roden Hor un groten Uhrn uptautrecken. Un wat hett mi dat argert, wenn denn dei Jungs von gägenœwer un näbenan, dei all dat tweite un drüdde Johr mit mi inne ierste Klass up'e Schaulbänk seeten, "Glühbirne" un "Sägeluhr" achteran reepen, un wenn't ganz dull keem un sei mi tau fåten kreegen, ok noch dat Späl mit dei "Eierie" måkten. Doch dunnemåls wüsst man, wennihr dat Späl ut sien müsst, dormit keinein tau Schåden keem. Un leepen denn all uteinanner, denn künn ik "Glühbirne mit Sägeluhrn" ünner Ümstänn' noch mitkriegen, dat's mi mit "Rote Haare, Sommersprossen sind des Teufels Volksgenossen!" brüden dän.

Driewend natt lött dei Alp nich von mi af. In'n Kopp scheiten dei Gedanken Koppheister: Is Brüden von dunnemåls nich deisülwig Såk as Mobben von hüt? Un is Mobbing nich dat, wat wi Plattdüütschen Brüderie näumen? Un denn bölk ik in'n Schlåp "MeToo, MeToo, mi ist dat ok passiert, dei hemm' mi begrabbelt..." Dei Schweit drifft man so. Un wedder dei Stimm': "Bring dei wägen 'sexuelle Belästigung' vör'n Afkåten, denn dat, wat's mit di måkt hemm', dat is dat, up dat sik männigein noch in't hoge Öller besinnen deit, üm so näbenbi noch por Piepen intaustäken!" Un denn gåh ik mien "Schänner" dörch: Klaus is all dod, Horst un Kurti sünd't ok, Franz hett sik dodsåpen un Rolf hett 'n Tour mit klauten Wågen nich œwerståhn... Un denn geiht mi 'n Licht up. Lenin sien Wark "Wat daun?" kümmt mi in'n Drom ünner dei Ogen un ik kriech den Råt, dei rod-gräun-gäle Taukunftskoalitschon mit ehr militanten Ansichten tau bidden, nich blot för queere Minschen un ehr Belange 'n Staatssekretär intausetten, sonnern ok einen, dei sik üm dei Belange von dei twei Purzent vosshorigen Börger un äbenso üm dei fief Purzent mit Sägeluhren kümmern deit. Sotauseggen möt 'n "Antimobbing-Staatssekretär" her, dei denn dat Fest för Rodvöss un Börger mit Sägeluhrn vör't Bramborger Dur in Berlin organisiert un ünnersöcht, woans in Ünnernähmen dat "Allgemeine Gleichbehandlungsgesetz" för disse Minschen utlecht ward. Un denn sitt up eins Spälmann Dominique Horwitz (Johrgang 1957) bi mi up'e Bettkant un meint, hei mit sien Uhrn un ik mit mien Hor, wi künnen uns mit Petitschon "Gliekstellung von Minschen mit rode Hor orrer Sägeluhrn" an'n Kanzler wennen...

Denn wåk ik up, möt dei Nachtjack wesseln un hür un seih wedder Nårichten un Biller ut 'n Gazastriepen un Donezk... Un denn singt dei rodhorig Milva (1939-1921), dei italjen'sche Diwa "La Rossa" ehr Lied "Hurra, wi läben noch..."