 |
|
Lichterwoch' in Rostock vun Hans-J. Grebin Siet dörteihn Johr lüchten un geistern in dei iersten swatten Abendstund'n üm denn Universitätsplätz, miern in Rostock, farwich Lichter.
De Stadtwarkslüüd hebbt sick ook ditt Johr werrer wat Nieges infollen laaten, üm up sick upmarksam tau maaken un dei Rostockers, un besonners dei Lütten, mit dei dunkeln Tieden, dei sick nu ankünnigen, vertruucht tau maaken — mit Licht.
Oewerraschungen för de trister wardende Johrestied sünd ook ditt Johr düütlich tau seihn. De "Stromer" wier wi ümmer dorbi un freut sick oewer de väälen Rostocker.
So hett dat 2007 uutseihn. Intwüschen hebb'n sick de LED-Lämpchen "breit maakt" un dormit is dat Farwenspääl vermiehrt worrn.
Ook dei Brunnen is nütt worrn un hett Waarergefleugel Platz gäben. Grote Lüchtblöck maaken de Plastiken ook inn Dunkeln sichtbor.
Ein einzich Farwenspääl rund üm denn Platz. Doch nich blots de Farwen beläwen denn Uniplatz, ook de "Kröpi"-Schauspälers, Gaucklers, Danzgruppen un Musik maaken de Abendstunn för Jung un Olt tau ein lustich Awwesslung.
Mit grote Oogen stahn de lütten Geister ann Tuun un laaten luudhals ehre Begeisterung tau hüürn, wenn se dei roden Pilz, dei Wölf ', dei Iesbären, dei Schwaans, dei ehr uut den Rostocker Zoo schon bekannten watschelnden Frackdrägers, Iesboorn un anner "Gelichter" seihn. Poor Jungens harrn dei Lüchtwürfel besett un trampeln vör Freud'.
Dat Wääer harr ook ein Inseihn, kein Rägen, kein Wind hett uns beiden Ollen — mien Fruu un mi — dat schöne Erläwnis vermiest, dei milde Nacht hett uns allens best geneiten laaten.
Dei witt un kolt Tied kann kamen un dei grote Rostocker Wiehnachtsmarkt harr sick för uns dormit schon ankünnicht. Wi warrn uns ook denn Spaß anseihn un heiten Wien drinken.
9.11.2014
|
Vör
Johr'n wiern poor Lichterketten in de Bööm oewer uns
tau seihn. Ditt Johr lüchten schon poor miehr blage Lichtreigen
un sogor Voegels uut de Bööms, ann "Brunnen der
Lebensfreude". 
