Echte Mäkelborger Wien

Wenn ick "Wien" hüür, mütt ick ook an mien Kinner- un Jugendtied denken. An uns Huuswänn' wössen ein poor Wienräben, an de Westwand un an de Südwand. Hinner de Wienräben wier de Wand mit schwart Farw sträken worrn, woll üm de Wärm' bärer tau hollen. Hüüt na oewer 8o Johr is dorvon nix miehr tau seihn. Ick heww de Wiendruben giern äten, datt duuert bit hüüt hen. För mien Läben giern nasch ick Wiendruben.

Hier nascht de Autor Wiendruven

Ein anner Erinnerung is mit de Konfirmatschon 1948 verbunnen. Wi wüssten, datt de Awschluss mit einen Schluck Wien ut einen Kelch verbunnen sien süll. Wien harrn wi noch nie nich tau drinken bekamen. Dorher verständichten wi uns, mit de Knei deiper tau rutschen un up disse Oort bäten miehr Wien rünnerschlucken tau koenen. Doch dat güng "schön" dornäben, denn dei Wien wier ganz suuhr. So wier, taumindest mi, dei Wien verleidt' worrn.

In'n September stünn in'n "Rostocker Blitz" disse korte Artikel:

"Senioren des Reiseklubs Rostocker Jahresringe planen eine Tagesfahrt am 04.10.2010 in das nördlichste Weinanbaugebiet Deutschlands, nach Rattey im Kreis Mecklenburg-Strelitz, südlich von Friedland."

Dat schöne Slott Rattey

Also, för mien Läben giern nasch ick Wiendruben, ook uut den Grund wier ick siehr daran interessiert, den Vörschlag tau verwürklichen, na dat Schloss Rattey as dat nördlichste Wienanbuugebiet in Düütschland eine Dagesfohrt mit unsen Reiseklub "55 Plus" tau maaken. Uns ierste Fohrt von de "Gemeinschaft Rostocker Johresringe" mit 39 Mitglieder un Gäst' uut Rostock bröchte uns bi schönstes Sünnenschienwerrer oewer dei Autobahn Richtung Neubrandenburg (Niebramborg/Niegenbramborg) in twei Stunnen pünktlich in dat lütte "gottvergätene" Dörp mang Hügel na Rattey an'n Südhang von dei Brohmer Barg (Brohmer Berge). An uns trecken dei pläugten bruunen grooten Schlääch un ook dei mit greunende Saaten orrer awmeiht Rapsfeller vörbi. Dei Landschaften warrn ümmer hügeliger, manch ein Kupp' mit Bööm bewussen, un vääl Holten kamen vörbi mit greun un gäälbrun Bööm, allens maakt einen gediegen Indruck un lött uns oewer de Landwirtschaft staunen.

Dei Winzer is ein Mäkelborger Jung

Ein godes Publikum

Wi wüürn von einen fründlichen 40-jöhrigen Mann in Winzerhemd vör dat Schloss empfangen. Hei stellte sick uns as de Winzer von Rattey vör un gewünn glieks dörch sien fröhliches upschlatenes Wesen uns all as gaude Tauhüürers. Wi wullen natürlich weiten, wie de Rebstöcke hier na Mäkelborg-Strelitz kamen sünd, hei bremste uns in uns Raasch un verspröök, uns allens tau vertellen, denn hei harr von Anfang an allens mitmaakt. Doch noch bliwwt dei Fraach, wie dei Wienanbuu hierher na Mäkelborg-Strelitz kamen is.

 

Hm, also bi disse Immobilie harr ik ok nich nee seggt!

Hoffladen bi Sloss Rattey

Na de Wenn' führ ein Ollt-Bundsbörger dörch de Lannen, üm sick na ein Immobilie ümtauseihn. Hei führte in ditt lütte Dörp, verführte sick hier un stött mit'n Pkw trüch un keek na hinnen un wüür ein Herrenhuus gewohr, nich grad schön antauseihn, doch gaud nauch, sick datt näger antauseihn.

Dormit wier dei Anfang maakt — ein Taufall. Irgendwie, denk ick mi, mütt hei wat mit Wienanbuu tau dauhn hatt hebben un "Konnektschens" tau Wienanbuugers upwiesen künnen, sünst wier woll allens nich wohr worrn. Hei bekääm de Genehmigung för denn Anbuu un ook ein poor dusend Wienplanten, de hei up 3,5 ha anplanten dörfte. Ja, dörfte, denn so streng is dat in Düütschland. Dei Besitters in dei westdüütschen Wienanbuu-Länner wullen sick "nich in dei Supp spucken" laten (Konkurrenz warrd kort hollen). Doch sei gäben em von ehr "Recht" bäten aww, denn ook in de EU is allens quotiert.

Herr Ebert verklaart allens

Anfaten is verlöövt

Hier kümmt dei Wien!

Ungefiehr 15.000 Rebstöck' dörfte hei anplanten un müsst einen privaten Winzer-Verein grünnen, de bit 2010 an de 350 Mitglieder stark worrn is. Doch wat nützen all de Planten, wenn dortau Minschen bruukt ward, de arbeiten künnen, vör allem ein Fachmann fählte, Winzer nöömt?

Slottgraven achter Slott Rattey

Ok entkorken mutt dei Winzer

De Besitter von Boorn un Herrnhuus fünn em in denn' 40-jöhrigen arbeitslosen Dörpbewahner Ebert.

Anfangs künn dei sick kuum vörstellen, allens tau bewältigen, doch hei freute sick, disse Arbeit funnen tau hebben un sick uutprobieren tau koenen. Denn' Mann hett dei Besitter tau verdanken, wat hei uns hüüt ganz begeistert verkloren künn.

Dei Anbuu von Wiendruben verlangt einen besünnern Boden — Lehmboden iss hier in't Endmoränenland in Mäkelborg-Strelitz vörhannen. Ook dei Hügels mit ehr sanft' Häng sünd ook von Natur uut dor. Ringsüm sünd groot Holt' as Schutz vör Starkwinn'. Gegen Frost wehrten sick dei Winzer ook hier mit sonne Rägennäbeldings. Sülwst gegen de Spreien un anner Krupptüüch wüürn Geräuschapparate insett, de von de Natur nich tau ünnerscheiden sünd.

Ran an de Reben, ji Johresringler!

Aver dalli!

2000 wüür anfungen un 2004 de ierst Wien awfüllt. De Pries wüür anfangs mit ca. 14 €uro festsett un wüür ook von de Kööpers annahmen, denn de Wien güng wech wie "warm' Semmels", vertellte uns Herr Ebert.

Hier liggt dei "Rode Regent"

Da kriegt ji Breef un Siegel up!

Dei Johresringler maakt sik in't Slott ein Bild

Dat Oog drinkt mit!

De Wien dörf bloots hier ünner denn Namen "Deutscher Landwein" verköfft warrn un kost' hüüt 10,75 €, schmeckt gaud för uns Begriffe. De Wiendruben von Burg Stargard warrn ook in Rattey verarbeit'. För de poor Planten lohnt sick kein anner Upwand. 2004 harr dat de Bundsrat in Berlin beschlaten — vörher wier de Wienveruurdnung ännert worrn un de Wienanbuugebiete "Stargarder Laand" üm Schlott Rattey un Burch Stargard höchst offiziell genähmigt worrn. För de Winzer in Süddüütschland kamen noch schlechte Tieden, wenn 2015 in de ganz' EU unbegrenzt Wien anbuut warrn dörf!! So sünd hüüt schon männich Gastronomen up de Idee kamen, nur 99 Rebstrüüker antaubuugen. So gahn sei allerhand Gegenwind uut denn Wech.

As de Juwelen staht se da

Ach, ein' Bedingung för denn Wienanbuu heww ick noch vergäten — dei Sünn! Doch dei schient ook bi uns in'n Nuurden. Sei is wichtig för denn Zuckergehalt in de Druben un de warrd mit de Oechslewaage määten. Wenn de Zeiger sick up 78 Grad inpendelt, denn is dat so wiet, un de Wiendruben warrn oornt. Wi koenen de Sorgen von de süddüütschen Winzers verstahn, de mit scheel' Blick up de nuurddüütschen Konkurrenten kieken. Doch de Anbuu inn flachen Land iss weniger upwendich un dormit kostengünstiger. "Allens mütt sick räken!" De so nöömt Klimawandel kann ook noch wat bewirken, oh Gott, oh Gott! Nich uuttaudenken — Nuurddütschlands Deipland — ein nieges Wienanbuugebiet in de EU?

Wa veel Promille sünd up dit Foto vereint?