Schöne Kunststraat in Pingstbarg

Op ole Weeg un Brüchen:
Kunststraten in Holsteen

vun Antje Heßler

Dat ole Forsthuus in Hollin fröher...

Hüüt flatter mi en Mail in't Huus. Den Schriever kenn ik gor nich. De Mail weer mit "Günter" ünnerschreven. De müss ik eerstmal lesen. Dat anhangte Bild weer dat renoveerte Forsthuus ut Hollin. In dat ole Huus hett mien Grootvadder för lange Tied wahnt. He weer Förster in den Gootsbezirk Rathmannsdörp.

...un hüüt

Mit mien Öllern föhrn wi oftins mit Fohrrad vun Projensdörp na Hollin. Weer ümmer en schöne Fohrt. Mien Vadder pass goot up, dat wi an de rechte Stratenkant vun den Feldweg föhrn. Deelwies harr de Weg grote Slaglöcker, de mit Water füllt weern. Rechts un links vun den Weg wussen hoge Knicks.

Schöön renoveert, nich? Bloots de Holt-Dekoration an't Dack is weg

Eenmal harrn wi Pech, wi harrn enen Platten un müssen dat letzte Enn uns Fohrad schuven. Un dat weer an enen warmen Sommerdag. De Sünn brenn vun wolkenlosen Heven. De Mücken un Flegen summen üm unsre Köpp. Ganz versweet kemen wi bi de Grootöllern an. — Hüütigendaags harrn wi dat beter. De Straten weern asphalteert un dat geev Fohrradweeg.

Schöne Landschap üm Pingstbarg — so sehg dat enerworrns ut, ehrdat dat Kunststraten geev

Een vun de twee Tweeschen-Denksteen

In Schleswig-Holsteen sünd düsse Weeg teemlich laat buut woorn. Se wöörn "Kunststraten" nöömt, orr mit dat franzöösch Fremdwoort "Chausseen". Dat schient uns vundaag vertruuter. — Nu is dat ja nich so, dat dat blangen "Kunststraten" ok "Natuurstraten" gifft; en Straat wasst ja nich op'n Boom. Man sünst geev dat bloots Sandweeg, un de güllen ja nu as Natuur. Un dat weern se ok — in de Harvstregen orr in de Sneesmölt in't Vörjohr, dor woorn se grundlos un lösen sik meist op. För'n Hannelsverkehr weer dat natüürlich Gift. Also woorn de eersten Straten plastert — dat weern de Chausseen. Ganz veel findt een in dat Rebett, dat vundaag Hamborg is; dormalen weer dat natüürlich allns noch Land. De Straten heet vundaag "Wandsbeker Chaussee" orr "Alsterkrugchaussee". De Straten in Hamborg binnen, de plastert weern, heet mehrst "Steindamm", so de Steindamm in St. Georg, de Lokstedter Steindamm usw.

Dat Ensemble vun de Denksteen mit de Verklaarnstafel

De erste Kunststraat över't Land wöör 1830 bit 1833 twischen Altona un Kiel buut. Un dat föhrt mi trüch up den Pingstbarg, denn dor kann man noch den Gedenksteen bewunnern. He woor 1826 to'n Gedenken an den Stratenbu opstellt.

De duppelte Denksteen

De latiensche Inschrift heet:

JVSSV ET IMPENSIS FRIDERICI VI HOCCE STADIVI PRIMVM IN HOLSATIA STRATVM EST RATIONE MACADAMI BRITANNICI — MDCCCXXVI

Op Platt:

Op Befehl un op Reken vun Friedrich VI. is düsse Streek as eerst in Holsteen na dat Verfahren vun den Briten MacAdam buut. — 1826.

De moderne Verklaarnstafel. Klick op to'n Vergröttern!

"MacAdam" hett eentlich John McAdam heten un weer en Schott, de en vigeliensche Methood utfunnen hett, ut ünnerscheedlich grote Köörn en durabeln Stratenbelaag to maken, den wi hüüt noch "Makadam" nöömt. Wat de olen Römer al lang kunnen, dat hett he wieder entwickelt.

De moderne Denksteen

Dor föhrn wi nu wedder övern Pingstbarg, na all de Tied. Wi hebbt uns Auto anhollen. De Pingstbarg leeg so richtig in de Holsteensche Schwiez. Dat güng bargup un bargdaal. Dor harrn de Peer up de olen Weeg düchtig to doon. Seker is so mennig Wagen steken bleven. Hüüt kemen de Autos mit hoges Tempo üm de Kurven suust. Wi müssen uns richtig vörsehn, dat wi nich överföhrt wörrn. Danke, ji Römers un Schotten!

Mennigmaal, wenn ik solk Feldweeg mit mien Auto föhr, dink ik, hier kunn dat Stratenamt ok en "Kunststraat" inrichten. Aver denn denk ik, nee, so'n Feldweg is doch veel schöner.