|
|
Maydanek
Wi sehn hör
de lange Straat
na 't Lager lopen.
Wi spören bi hör
Ohnmacht.
Hör Vertwiefeln
ritt uns an 't Hart.
Wo de Baracken
nahder komen,
de Wachttoorns
groter worden,
gefahrelk de Poorten
sük opendoon
Feld I för Frauen un Kinner
Feld II
Feld III
Feld
Feld ...
De Galgen up elke
Appellplatz.
De dünne Figüren,
noch Minsken.
De Angst,
De Nood.
De Disziplin van de Dood.
De Schergen in Uniföörm,
noch Minsken.
De Angst?
De Nood?
De Disziplin van de Dood.
Pritschen in dree Etagen,
Stroh mit Wanzen.
Furen van Deken.
Dood mit völe Gesichten.
Smacht.
Koll.
Verraad.
Stolt.
Gaskamer.
Dodengracht.
Dokters, as was
de Eed van Hippokrates
noit schreven,
sproken,
docht.
Wi Keerls ut Oostfreesland,
geboorn,
as dit hier geböhrt,
stahn vör de Stoff
van Achthunnertdusend.
Un uns Tranen
mengen sük mit
Knaken, Schoh, Brillen,
Kammen, Tannen, Kuffers
Tasken, Haar ...
|
|
|
