Vun grote Gnaad

vun Richard Weigand

Vun grote Gnaad harr uns Paster predigt. Gnaad för Arme un Hungrige, in Kriegs un Nokriegs-Tieden. To de Tieden harrn al de Minschen Smacht, de Utbombten ut de Städte, de Verdrebenen ut Ost un Westpreußen un og de Hiesigen. Dor weer dat een grote Gnaad vun de Buern, de hungrigen Minschen op ehr Feller, Kantüffel stoppeln to loten un later og de Ähren vun dat Kurn to sammeln.

De Gnaad mit Kantüffelstoppeln harr aver og mit de Landmaschin to doon; de Buur plöög mit Peer un Roder de Kantüffel ut de Eer. De müssen nu vun Helperslüüd obsammelt warden; dorbi bleven Kantüffel in de Eer un vele wörn og vun de Helper mit de Scho wedder rinnpett. Mach ween, se hebt dor later sülben stoppelt. -

Rööv. Foto Garitzo/Wikimedia commons

Mit son Arbeed heff ik mi dat erst Geld verdeent, Kantüffel sammeln, Röben planten, og Röben trecken. Foftig Penn de Stünn, tweeföftig för den halven Dag.
Röben trecken güng bi uns og mol anners, wi harrn wedder mol Smacht un nix to Eten, wussen aver een godes Feld mit Steckröben, uns Överlebensmiddel to de Tied. Man mit twee Röben in de Hannen kreeg de Buer mi foot, un in sien grote Gnaad hau he mi fix wat ob'n Moors. De Röben heff ik liekers mitbröcht un de Wehdaag og flink vergeten.

Aver nu weer Konfirmanden-Ünnerricht, mit achtein Jungs in den Johrgang. Dor keem no'n Ogenblick de Fraag vun den Paster: "Richard, du kennst das siebente Gebot?" "Ja-a, du sollst nicht stehlen!" "Und die Steckrüben?", froog he. "O Mann, woans weet he dorvun?", frag ik mi un anter em "Ik harr Hunger!"
Vun achtern keem de Fraag vun een vun de Jungs: "Herr Paster, welche Nummer bekommt das Gebot Du sollst nicht Hunger leiden?" Mi dücht de Paster krööp son beten in sik rin, brabbel wat vun böse Tieden, un wieder güng de Ünnerricht.

As Grote Gnaad is mi för mien Leefdag bleven: dat wi düsse legen Johrn heel un gesund överleeft hefft, in Freden un Frieheet!

Ach bleib mit deiner Gnade bei uns, Herr Jesu Christ, dass uns hinfort nich schade des bösen Feindes List!

Dat to hebben weer en grote Gnaad. Bild Richard Weigand