 |
|
vun Günter Weber Dat weer die ierste Gollen Hochtied na denn Oorlog in dat lütte
Dörp in Vorpommern.
Dat in dat Bild baven weern wi dree Enkel in dat Vörjahr 1961.
Dor heff ik uns Grootellern dat letzte Mal seihn. Vun de Gollenhochtied
in August 1959 gifft dat kein Biller miehr. Dat 5. Flakregiment ut Stallberg is mit Raketen op Rerik bestückt worren, üm den kapitalistischen Fiend beter ophollen tau künnen. "Urlaubssperre" weer de Parole. Un Oma und Opa harren Gollen Hochtied. De Schwiegerdöchter von de gefallen Söhns, de Fruun un de Kinner — mien Cousins un Cousinen — all harrn sick anseggt. Bloots ik op die Halfinsel Wustrow müßte na den "kapitalistischen Fiend" Utkiek hollen. Wat schullen wi maken? Urlaub man bloots bi "besonderen Familienangelegenheiten."
Vör dat Zelt leeg ut Wustrow en Telegramm: "Tante Henriette
ganz plötzlich verstorben." Sünndags is de Gollen Hochtied. Ik weit nich miehr, wo de bloß all schlopen hebbt. Drunken hebbt wi düchtig wat. Oma hett naug "Bärenfang" opsett. Meist schaad is, dat mien Biller nich mitkamen sünd, as ik von dor weg bünn. De grote Kamer, de bi de LPG ok "Kulturraum" benöömt wöör, weer fein trecht maakt. Morgens üm Klock teihn keem de Paster. Twei Mann Musik seten ok in en Eck. De Paster harr en groot Urkunn vun den Bischof Krummacher ut Griebswald dorbi. De Gratulant vun den Rat des Kreises Ollentreptow hett uns Oma doch glatt hunnert Mark oewergeven. Ja, un nu kümmt "Henriette" in dat Spill.
De so plötzlich sturven weer, weer en groot Bullenkalv, dat uns Opa vun de LPG kregen harr. Dat Kalf un noch en Swien sünd bi Schlachter Fanter in Ollentreptow för de ierste Goldhochtied na den Krieg in Klempenow verarbeitet worden. Ik weit dat noch as hüüt — dat ganze Taurechtmaken hett de Schlachter Fanter för mien Grootellern as ehr Gaav anseihn. De beiden Musiker speelten allens, wat alle singen kunnen. Mien Grootvadder danzte mit alle de "Damens". Opa danzte jo ümmer so fein mit dat Taschendauk in de Hann, de op den Rügg van de Partnerin tau liggen keem. Ja un denn Schieber dörch die groote Stuuv! — Oma danzte nich, wiel sei nich miehr so gaut op de Been weer. Mit ehr Kroon op den griesen Kopp seech sei doch recht gediegen ut.
Obwohl ik noch Urlaub harr, bün ik na Wustrow trüch. Mien ierste groote Leiv haar een Jahr tovör meent, wat Bäteres tau finnen. Nu wull sei dat "ungeschehen" maken. Ik aver nich miehr. 1978 bün ik werrer dat ierste Mol in dat lütte Dörp na Vorpommern kamen. In en Blatt vun de NVA heff ik lääst, dat mien damalige Chef Oberst Bartel noch Generol worren is. Hei ist 1989 störven. Ik heff ehm aver noch besöcht. Tau den "Doot" vun Henriette hett hei mi nie nich froogt. Bi den Bericht vun dei Gollen Hochtied hett hei so richtig sik ennen grient.
19.7.2015 |
Gollen
Hochtied
Na
denn Meddag geev dat den gauden Bohnenkaffe ut Hamburg. Dor hett
Tante Hanni för sorgt. (Tante Hanni geev dat wirklich, se weer
keen Bullenkalf.) Denn geev dat ok noch de feinen West- Zigaretten.
Nee, nich de Turf, dat geev Casino oder Corso. So männicheen
hett sich davon en poor inne Tasch stoppt. 
