Glücksbringer
tau Niejohr
vun Behrend Böckmann
Glücksschwien un Glücksklewer
Dat Glücksschwien un dei Glücksklewer ståhn ganz
vörn anne Front vonne Glücksbringer tau Niejohr. Glücksschwien
sünd ut Marzipan orrer ut Schokelor, ut Plüsch orrer ut
Plastik, ut Pappmaschäh orrer ut Gummi un süss noch wat.
Dei Bruk mit dat Glücksschwien rööcht all ut germanische
Tieden, denn tau disse Tiet wier dei Bier (Äwer) 'n hillig
Diert un güll as Teiken för Besitz un Riekdaum, för
Kraft un Fruchtborkeit. Wecker 'n Schwien harr, mösst nich
an't Hungerdauk gnågen, un dei Schwienskopp orrer'n Mörbråden
keemen Niejohr up'n Disch. Un wieldat man wull, dat in't Niege Johr
wedder niege Bråden ranwassen, geef dat 'n Glücksschwien,
dat ünner Ümstänn' sogor up'n Disch danzen künn.
Dor
'n Schwien ja ok Gräuntüch fräten deit, geef dat
oft noch Klewer hentau, denn ok Klewer hürt tau dei Glücksbringer.
Hei bringt wer blot Glück, wenn hei denn vier Bläder
hett un åhn grot Säukerie funnen ward. Un Glück
bringt son'n vierblädrig Blatt nie nich den Minschen, dei dat
funnen hett, sonnern blot den, dei dat as Geschenk krägen hett.
Lecht sik taun Bispill 'n junget Mäten son'n schenkt Klewerblatt
ünnern Poehl in ehr Puuch, denn süht sei in'n Schlap ehrn
Leiwsten. Christen düden dei vier Bläder ok as dat Krüz
un leggen dat ahn Weiten von'n Preister ünner dei Altordeck.
Hett dei Preister denn dreimal sien Prädigt hollen un dat Klewerblatt
nich funnen, denn schützt dat Blatt dei Christengemeind vör
Blitz un Dunner un all dat, wat süss noch Leget passieren künn.
Ok Klewer gifft dat as Schwien ut Pappmaschäh, Schokelor, Plastik
un ok as lütte gräune Plant in Pott.
![](erinn_biller_2/glueck_2.gif)
Dei schwatte Mann un Poggenstäuhl
Klewer
in lütten Blaumenpott ward miersten noch mit anner Glücksbringer
as Schoßsteenfäger orrer Poggenstäuhl upfidummt.
Dat dei Schoßsteenfäger ok tau dei Glücksbringer
hürt, hett tauminnest drei Grünn'. Dat wier all Glück,
wenn man den schwatten Mann inne Moet keem un man sien schwatten
Kledaschen un dei güllen Knöp anfåten künn.
Glück wier dat ok, wenn dei Schoßsteen fecht un sottfrie
wier, so dat dat Hus nich so fix Füer fangen künn; un
hier un dor wür den Schoßsteenfäger wägen sien
schwatten Düwelskledåschen dei Kraft tauschräben,
mit den utråkten Sott dat Hus un sien Inwahners vör Gefohren
un Krankheiten tau schützen. Nich tauletzt wier hei oft dei
Ierst in't Niege Johr, dei mit den Niejohrsglückwunsch sien
Geld instrieken wull.
Dei
rode Poggenstauhl mit dei witten Placken is giftig, un liekers güll
hei all tau dei Germanentiet as Glücksbringer. Woans dat dortau
kåmen is, is hüt nich mihr ruttaukriegen. Man weit blot,
dat dat up dei Twölwen taurüch geiht un vertellt dit:
Wenn Wotan mit sien Fru inne Wulken ünnerwägens wier,
sünd ümmer nägen Månde laters up'e Ierd disse
rod-witten Poggenstäuhl dor wussen, wo 'n Pierappel rünnerfollen
is. So is hei taun Wihnachtsdekoratschon worden, in't Leed "Ein
Männlein steiht in'n Holt allein..." ward von em sungen,
un hier un dor ward hei ok mit'n Düwel un dat Düwelsspill
in Verbinnung bröcht.
Sünnenkäwer un Glückspenning
Glücksbringer
as Sünnerkäwer un Glückspennig gifft dat ut Schokelor,
oewer ok ut allerlei Tüüch, dat 'n nich äten kann.
Vör Tieden, as dat noch kuppern Pennigs geef, glöwten
dei Minschen anne Wunnerkraft von Kupper un harrn ümmer 'n
Kupperpennig inne Tasch, üm sik vör böse Späukel
tau schützen. Inne Büxentasch von'n Mann süll hei
sogor för Wunner wirken wat dei Manneskraft angüng. Nå
un nå wür dei Pennig dat Teiken dorför, dat einer
Glück hett, wenn hei mit 'n Pennig anfangt. Pennigs würn
tau Döpdåler, Pennigs würn för dei Brutschauh
sammelt, Pennigs würn anne Stalldören någelt, üm
Käuh un Schwien vör Hexen tau schützen. Un so keem
dei Bruk up, dat dat taut Niege Johr ok 'n Glückspennig as
Teiken dorför geeft, dat nie nich dat Geld utgahn süll.
Die
Wunnerkraft von den Kupperpennig lött sik noch verbädern,
wenn man die Sünnenkäwers mit in't Späl bringt. Die
Sünnenkäwers heiten ok Marienkäwers, denn sei sallen
'n Gåf von Jesus sien Mudder Maria sien. Dorbi sallen sogor
dei sben lütten schwatten Placken up'e Flüchten
up dei sben Tugenden vonne hillig Maria
hendüden. Anner Minschen seggen, dat dei Sünnenkäwer
dörch dei sben schwatten Placken up'e roden Flüchten
dei Kraft hett, Hexen un Unglück aftauhollen. Ut dissen Grund
dörp keinein denn Sünnenkäwer wat andaun, sonnern
em as Glücksbringer verihren.
Haufiesen un Draudenfaut
As
Glücksbringer tau Niejohr gellen ok dat Haufiesen un Twiegen
von'n Draudenfaut (Mistel); die Draudenfauttwiegen warden mierstens
oewer dei Ingangsdör von't Hus anbröcht. Un dat hett sien
Bedüdung, denn wenn Brut un Brüjam tau Niejohr ünnern
Drudenfaut annerswo heit hei ok Hexenbessen, Kenster, Düwelsklau,
Marentacken, Nistel orrer Albranken 'n Säuten gäben,
denn lött dei Hochtiet nich mihr lang up sik täuwen. Un
geef dat noch'n Haufiesen wer dei Dör, denn künn
dei Düwel nich mål wat dorgägen måken. Un
dat keem so: Dei Pier würn as Teiken för Kraft un Kråsch
all tau dei Römertiet Haufiesen ünnerschlagen, üm
dei Pier tau schützen. Un ut dissen Schutz för Pier is
dat Haufiesen in'n Globen taun Beschützer
von Minschen worden. Wecker 'n aflopen Haufiesen fünn, harr
Glück un hett sik dat wer dei Ingangsdör annågelt.
Von nu an künn kein Minsch mihr in Düwelsgestalt tau em
kåmen, un wenn dei Düwel sülben keen, denn wür
hei von't Iesen einen wischt kriegen. Man mösst bi't Annågeln
blot uppassen, dat dat åpen Enn nå båben wiesen
däd, denn süss füll dat Glück ut dat Iesen rut.
Schützt sik männigein noch hüt mi 'n Haufiesen von'n
Pierfaut oewer sien Dör, so verschenkt hei ok giern 'n Glückbringer-Haufiesen
ut Schokelor un Marzipan tau Niejohr, dormit dei Düwel sien
Fründschaft nix anhemm' kann.
28.12.2022
|