Leven bi en Gautsherrn, Deil 5 :
Wi weern nich arm

vun Rudi Witzke

Dor hett Vadder uns maal to faten kregen bi een vun unse Spille. Wi stünnen dor achter den Holtschuppen mit uns "Rennwagens". Wenn een nau henkickt, sühst, dat nich all en "Wagen" hebbt.

Woso kemen wi up Rennwagens? Natüürlich kennten wi de Rennfahrers von 1937 so as hüüt de Jungs de Besten vun de Formel I. Bernd Rosenberg keem bi en Versöök, en Rekoord to föhren, üm't Leven. Uns anner Held weer Rudolf Caracciola. De Biller, de in't Stråålsunner Blatt afdruckt weern, sneden wi uns ut.

Rudolf Caracciola up de Avus in Berlin. Bild ut dat Bundsarchiv

Schuttbarg. Foto Ger'lat/Wikimedia Commons

Uns duurten uns Maten, de keen Rööd harrn. Wi harrn uns up den Schaulplatz en Rennbahn mit Kurven un graad Strecken afsteckt. De Rööd schöven un lenkten wi mit en Stock, den wi gegen den Pricken hölen, de dörch dat Ass-Lock steckt weer.

In uns Dörp weer bi besten Willen keen Raad to finnen. Aver wi weer ja nich arm. Dor weer in Stråålsund de grote Schuttbarg. Dor müßten wi mal säuken.

Un wi wöörn fünnig in unsen Müllladen, de hüüt en Lego- orrer Playmobilladen sien mutt. De Schuttbarg harr den Vördeil, dat wi nix betahlen müßten. Veel annern Kraam nehmen wi nich mit na Huus, wi brukten bloots Rennrööd.

Probefohrt mit nieges Rad, linke Achterpoot ramponeert

Vadder, de in de iersten Johren ok mien Liehrer weer, kunn spannend un upregend vertellen. Dor keemen denn in dat Johr 375 vun ganz wiet ut'n Oosten de "Hunnen" antorieden. Denn vertellte hei vun Toors un Pottjees un Karl Martell un dat wi nu nich Muselmanen warden müßten.

Blaag-gräune Binsen. Wikimedia Commons

Ganz wat Kurioses weer dat mit Uros-Indiåner un den Titicaca-See. Wannderdag weer ansett. Un wieldat de Hitt brüüdte, tröck Vadder mit all sien Schäulers na'n Pütter See na de Baadsteed in Pütte. Un hei nütte elkeen Gelegenheit, uns wat bitobringen.

Hüüt weer de blaag-gräune Bins an de Reig. Hei wieste uns, dat in den runden Halm luder Luftkamern weern. Een kunn sik Bünnel afsnieden un harr en lütt Schipp.

Uros up ehr Insel in'n Titicacasee. Foto Andre Engels/Wikimedia Commons

Nieschierig wöörn wi, as hei vertellte, dat wi in de Schaul en "Anschauungstafel" vun de Uros-Indiåner up den Titicacasee harrn, dat hei mit uns negsten Dag bekieken wull. Dunnerlüttjen, wat kregen wi dor to seihn. Een wat grötter Oort Binsen wasst dor. Dorvun buut de Uros lütte un grote Scheep. Up de Flucht vör anner Indiåners, de Mayas, buten de Uros ut Binsen grote Inseln un stakten rut up den bannig groten Titicacasee. Se harrn dat best Versteck.

Denn vertellte Vadder, dat de Uros mit de Tiet över 40 Inseln buut hebbt un bit hüüt so leven, de "Inseln" utbedern un grötter maken. Up een Insel hebbt se sik en Kark buut.

Dor harrn wi wat to Fantaseeren. Villicht kunnen doch wi mit de Pütter Jungs tosamen en solk Insel ut Binsen trecht kriegen.

Pütte. Teiknen Rudi Witzke

Swattbroot ut Suurdeig vun'n Pütter Bäcker

Dat müßten wi jüm maal bi't negste Broothålen bekåkeln. Siet de Bäcker nich miehr mit en Fuhrwark dat Broot bröchte, müßten wi dat hålen. Elkeen kreeg so veel in sienen Rucksack, as hei drägen kunn, un de Brootkarawaan tröök vun Pütte na Klein Kordshagen. Dor wöör verdeilt.

De Pütter Jungs, mit dei wi uns gaud verdrögen, harrn aver keen Lust, ut de Binsen en Scheep to buun. Se glövten uns ok nich, wat wi vun de Uros vertellten. Se hebbt ja nich mien' Vadder sien Vertellen höört. Se hebbt das Bild nich seihn.

Blaag-gräune Bins. Foto Christian Fischer/Wikimedia commons

Uns güngen de Binsen aver nich ut den Sinn. As wi anner maal bi uns Kordshäger geheem Baadsteed weeren, hebbt wi toierst uns Wittfisch angelt un över Holtglaut up en Stock "grillt".

Holtglaut. Bild Hedwig Storch/Wikimedia Commons

Denn hebbt wi mit Sicheln so veel Binsen afsneden, as wi kunnen. Een vun uns hett en Rull Binngoorn vun de Sülfstbinner besorgt.

Goorn för'n Sülfstbinner. Bild ut dat Bundsarchiv

Wat hebbt wi arbeidt! De Barg vun Binsen weer schonst schöön groot. För en Schipp weer dat aver nich naug. Wi müßten noch maal wedderkamen. Wohrhaftig, wi kregen nu en flaches Schipp trecht, up dat drei Bengels sitten un mit ole Bräder raudern kunnen. Nu schull dat neegst Tuur aver richtig vörankamen mit uns Binsenschipp, dat wi in't Reeth versteckt harrn. — Wi seten bedebbert dor. Jichenseen harr uns uns Schipp klaut.

As begåten Pudel trotten wi na Huus hen. Wi hebbt dat nich schafft, Uros to warden. De Pütter See bleev in de Hannen vun de Bliekgesichter.

Pütter See. Foto Klugschnacker/Wikimedia Commons

Wat åver en veel grötter Wunner is, dat is, dat de Uros noch hüüt up ehr Binseninsel levt un wi al frööh up de Nääs fulln sünd, jüm dat natomaken.

Uros up ehr Insel in'n Titicacasee. Wikimedia Commons

De Verfater