vun Henning Eggers

Bunt geiht dat her op düsse Welt:
Eerst harrn wi Krieg, denn keen Arbeit un keen Geld.
Jo, in uns Generat'schon hett sick würklich wat daan,
doch hüüt köönt wi sehn: To wat sünd wi uns koom'n!

Wi harrn keen Heizung un harrn ok keen Bad.
Wi hebbt ok keen Radio un Fernseher hatt.
Ok Telefon harr lang nich Jedeenmann!
Wo dat doch heet: "Roop doch mol an!"
Dat Frollein vu'nt Amt hett uns fröher verbunnen,
dormit de Geschäftslüüd telefoneern kunnen.
Hüüt geiht dat drahtlos över Satellit,
un anduernd mookt dat Handy "Tüdelüt!"
Nu köönt wi uns mit de hele Welt verstohn
un de Lüüd sabbelt in't Sitten, Gohn un Stohn.
Meist hett jüm dat Smartfoon den Verstand wegnohmen...
Un weller köönt wi sehn: Wo wied sünd wi komen!

Ok in de Köök weiht en annern Wind:
Perfekte Technik man dor nu find!
Mit Dunstaftoog, Mikro- un Umluftherd,
un allens is dorbi fachmännisch monteert.
De Schuven loopt op Rullen ganz licht,
so'ne niemod'sche Köök, dat is en Gedicht.
Mit Kohlnherd an Schosteen, dat is vörbi,
un mit Holtkassen vull Kratt, wat wär't 'n Schinneree,
vun open Füer ween de Pött all swatt,
un wie oft hebbt wi en anbrennt Grüttgrapen hatt!
Eerst wör he inweekt un denn mit Soda utkratt.
— So ward dat hüüt all'ns nich mehr mookt,
denn Grapen un Pannen sünd mit Teflon beschicht,
un dor ward ok keen Pott mehr mit Pottdicht afdicht!
Un weetst du vun't Kaken wirklich gornix,
denn deit dat för di de Thermomix!
Rezepten kannst online rünnerladen,
un foorts kannst du kaken, backen un braden.
De Apparaat kleit den ganzen Kraam tausomen,
un weller köönt wi sehn: To wat sünd wi komen!

De Asch keem na buten in de Eck vun den Goorn,
wi harrn noch keen Mülltünnen, de afholt worrn.
Dor woor ok keen Buddel in'n Container rinsmeten,
dor hebbt wi den Saft vun Johannisbeern ringeten!
To'n Drinken harrn wi Kloorwater ut'n Sood.
Dat weer nich steril, man wi verdrägen dat good.
So veel Gruschens as hüüt hebbt wi nich hatt —
en rode Bruus, dat wär schon mol wat;
un en Cocacola, o Mannomann!
Hüüt kümmt dat Tüüchs ja gliek kistenwies an.
Trennt hebbt wi den Müll nich, de Grund is slicht:
Solk Bargen an Müll, de geev dat nich!
Vun Plastik in't Meer kunn nümsnich wat ahnen!
Un weller köönt wi sehn: Wo wied sünd wi komen!

Dat wär ok ganz anners, wenn dor en Baby keem,
dat regelt sick fröher alln's vun alleen.
Wi wörn nich meten un nich wagen,
dat hebbt wi alln's de Natur överlaten,
Mütterberatung un Vörsorg, dor wüss man nix vun.
Geev bloots Oma un Modder, de Raat geven kunn'.
Modder Griepsch kreeg Bescheed, wenn't wär sowiet,
se packt ehr Tasch to de richtig Tied.
Vun Opklärung in de School, dor hebbt wi nix hört,
dor wüss ok keeneen, wie't alln's funkschoneert.
Hüüt gifft dat de Pill. Speelt hüüt noch Kinner
buten op de Straat? Dat warrt minner un minner.
Dorför leewt de jungen Lüüd jo glieks tosomen.
Köönt wi ok dorto segg'n: To wat sünd wi komen?

So sünd wi rundrüm un överall all recht wat klöker,
wi seht dat schon an de patenten Kinnerböker.
De Babys, de blaart nich mehr un sünd jümmer froh
mit de luftgepolsterten Pampers an'n Po!
En wunnerbare Saak, ok schön un bequem,
de Öllern bruukt blots jümmer en Nie'e to nehm.
Dor liggt nix mehr op de Bleek in'n Goorn,
dat ward nu allens mit den Müllwogen wechfohrn.
Dat Winnelnwaschen, dat is vörbi —
is keeneen begeistert vun de Swienerie!
Mit de Pampers is dat alln's överstohn!
Un weller köönt wi sehn: To wat sünd wi koom'n!

Ok mit de Utdrück sünd wi uns koom'n,
dat gift so veel niemod'schen Krom;
wi hebbt Girls un Boys, Teens un Twens,
Rockers un Penners, Fixer un Fans.
De sünd heigh un heppy un dat is nich fair,
dat nervt un dat motzt un wat noch alln's mehr.
Ok Azubi's hebbt wi fröher nich kennt,
wi hebbt ehr eenfach Lehrlinge nennt.
Azubi — so'n dumm Gesnack,
dor brickst di jo batz de Tung bi aff.
Un wenn wi Olen dat denn nich glieks kapeert,
denn seggt se: "Ji sünd geistig ünnerernährt!"
Fröher hebbt wi för uns Bildung noch so veel daan,
liekers seht wi't in, wied sünd wi nich koom'n!

To'n Sluss noch'n beten wat vun de annere Siet,
de wi nich kennt hebbt in de goode ole Tied!
De Fisch, de wärn gesund, de in't Water swumm,
wo wi ok ohn Bedenken baden kunn.
De Larm un de Afgas vun de poor Autos, de hebbt uns nich stöört,
de Larken, de sungen un avends de Pöch wi höört.
De Aadebar'n, de funnen genooch to freten.
Un nix weer vergift, wat wi kregen to eten.
"Zum Verzehr nich geeignet" — dat hett dat nich geven.
Doch wi nehmt't, as dat küümt, un sünd rundrüm tofreden!
Wi hebbt dat bither jo alln's good överstohn
un freut uns, dat wi so wiet sünd koom'n!

Op en Familienfier 2005 vun Cousine Inge Dunker op Hamborger Missingsch vördragen,
op Holsteener Platt nie verfaat vun Henning Eggers