 |
Op ole Weeg un Brüchen:
vun Antje Heßler Se köönt de Fotos per
Klick vergröttern.
Trüch kaamt Se denn mit den Zurück-Knoop op de Browser-Symboolliest.
Egentlich wullen wi uns mal wedder in "Entenhausen" enen goden Entenbraden gönnen. En Lokal in Schürsdörp weer för besünners goden Entenbraden bekannt. Wi weern jedet Winterhalvjohr eenmal dor, un ümmer wedder smeckten uns de bradenen Aanten so goot, dat wi dat Lokal mit den Naam "Entenhausen" betekend hebbt.
Up de Fohrt dorhin hung de Magen uns al scheef. Hoffentlich kregen wi noch enen Parkplacken vör dat Lokal. Fröh noog weern wi ünnerwegens. Dat sehg recht goot ut, dor stünn blots een Auto. Aver ach, an de Döör hüng en Zettel "Betriebsferien"! Ganz bedrüppelt un mit lerrigen Magen möken wi uns up den Trüüchweg. An de Krüzung full uns en Wegwieser mit verscheden Naams up. De Naam "Schürsdörper Fierth" möök uns nescheerig. He wies in Richt vun den Woold. "Laat uns den Weg mal föhrn!", meen ik to mien Mann.
Dat weer Harvst un de Woold lüüch in smucke Harvstfarven. In de Mööt keem uns ut den Woold en Riedersmann. Un de harr en Handy in de Hand! Wat weer dat vör en Bild! "Kiek di dat an! Hier stööt twee Welten upeenanner! Een Rieder mit en Handy up en Wooldweg!" Wi föhrn wieder un wunnern uns över den Naam "Fierth".Wat de wull to bedüden harr. Ole Bööm stünnen an'n Wegrand. Weer hier am Enn en Beek wo dat en Furt geev? Aver wi kemen blots ümmer deper in den Woold. Af un an schimmer en eensam Huus mank de Bööm. Up en Lichtung stünnen twee Peer an en Futterkrüff. De Woold weer teemlich düster un wi vertövert.
Nu güng de Weg mank de Bööm dull bargan. Baven up de Kupp weer dat hell. De Sünn harr intwischen en Lock mank de Wulken funnen. Dat letzte Loov lüüch golden. Över en Gatter harr man enen wunnerboren Blick in de Feldmark. Mit de bunten Harvstfarven kunn dat kuum schöner ween. Up uns Trüüchfohrt güng uns noch ümmer wedder de Naam "Fierth" dörch den Kopp. To Huus hebbt wi eerstmal nafraagt. Aver dor wüss keen so recht Bescheed. Denn heff ik eerstmal mien Böker ünnersöcht. Dor wöör wohrhaftig dat Wort Fierth verkloort Vierth / Fierth kennt man in nedderdüütschen Ruum as Flurnaam. Dat heet soveel as "wilden Woold" un "Heid, unbestelltet Land"! Dor geev dat fröher ok noch Blickbeern.
Flurstücken orr Höff mit den Naam Fierth, Viert orr Vier gifft dat an mehrere Steden, ok an'n Bornhöveder See gifft dat en Straat un Hoff "Vier". Dat kunn good un geern desülvige Spraak-Wöttel hebben. So hett uns düsse Weg ok deep in de Spraak föhrt. Dörch den Wegwieser mit den Naam "Schürsdörper Fierth" weern wi mit uns Gedanken in de falsche Richt gahn. Wi söchen immer na enen Weg un dorbi weer dat en Flurnaam! Aver liekers en wunnerboren Weg dörch den Woold. Dat lohnt sik, den to föhrn.
|
||||||
|
|
