Draken opfieren

vun Meike Balzer-Fraun


Een Johr is dat al her, siet wi hier na Brundorp hen trocken sünd. Dat weer 1980. Op dat Flach achtern Tuun wuss in'n Sommer Haver, un dor is nu so'n richtig feinet Stoppelfeld.

Uns Dochter is veer Johr oolt un schall en Draken hebben. 1981 bruukt een daför keen Anwiesen, wi leevt noch ahn YouTube. Ok en Klöteriebook is nich nödig: Drakenbu is Allgemeenweten.
Papeer, Band, Klever, 'n poor holten Liesten un de lange Drakensnoor op de Rull sünd gau tohoop söcht, un na en Stünn bammelt dat staatsche Stück an't Fenster vun de Wahnstuuv.
Sodraad de Wind puust, sünd wi mit uns Deern buten op't Feld.
De grote blau rode Draken fleegt wunnerbor, un de Lüttje höllt em goot fast — bet se ehren Papa en Vagel wiesen will!

Flink as de Wind seilt dat Kunstwark nu hooch op na'n Heven. Bald hangt de Snoor in de Hoochspannenskavels, un de Draken mit sien langen Slöfensteert steiht stolt doröver in de Luft.

So'n Schiet aver ok! Dat is in de Büx gahn.
Wi hööpt, dat nich noch wat an dat Stroomnett passeert, un roopt foorts dat Stroomwark an.
Uns Naam un Adress wüllt se weten, wo nau de Draken hangt un wo lang de dor al fast sitt.
Dat warrt ja woll en düren Spaaß. Wat de Graadstahplichtversekern dat woll betahlt?

Lang bang töven bruukt wi nich, bet een mit uns Draken in'e Hand an de Butendöör pingelt: " Guten Tag, haben Sie uns den Drachen in der Hochspannungsleitung gemeldet?"
"Ja, das waren wir."
He drückt mien Mann en 20-Mark-Schien in de Hand: "Wir möchten uns ganz herzlich bedanken, dass Sie uns angerufen haben. So konnten wir den Störfaktor schnell beseitigen!" —
"Aber, … das ist unser Drachen."
"Ach so, … na ja, das kann ja mal passieren." He gifft mien Mann den ‚Störfaktor' un will gahn.
"Wir danken auch. Aber mit dem Geld trinken Sie mit Ihren Kollegen man mal ein schönes Feierabendbier!" Mit düsse Wöör wesselt de Schien wedder sien Besitter.

As de Butendöör dicht is, kann een de Steen vun uns Harten pultern hören.

De Snoor is weg, de Draken twei, man as Dekoratschoon blifft dat schöne bunte Kunstwark bet to'n 1. Advent an't Fenster hangen.
Beten scheef hett Gott leev.


10.9.2022

 


na baven