För gewöhnlich kann een nich grååd seggen, dat een Gaststuuv de richtige Ümgang för junge Minschen is, dee jüst ut de School un in de Lehrtiet sünd! Man dat weer in de sösstiger Johrn, dat een Kroog in Eckernför vun all de annern afsteek.

De Borbyer Kark vis à vis vun de "Capitol-Stuven", in dee Klås dööpt, konfermeert un verheirååt worr. Klick up to'n Vergröttern!

De Borbyer Capitol-Stuven

vun Klaus-Dieter Tüxen

In de Fischerkoppel, vis á vis vun Berufsschool un Borbyer Kark, weer mit dat "Capitol" een vun de dree Filmtheåters in de lütt Fischerstadt; de annern heten "Hansa-Theåter" in de Langebrüüchstrååt un "Stadt Hamborg" in de Kieler Strååt. To all höör ok een Gaststuuv — un hier mutt de "Capitol-Stuuv" sünnerlich nennt warrn.

Wiss, hier bi Manfred un Lilo geev dat ok all'ns, wat duun un krank möök, un liekers weer dat wat anneret. In dütt Lokal mit 'n ganz figelienschen Billjarddisch weer ok dee junge Minsch hartlich willkåmen, dee nich so veel Vertehrkrötens harr, sonnern blots bi een, twee Glas Beer oder Cola stünnenlang an den Billjarddisch togangen weer, ohn dat he nödigt worr.

Dat Hööfthuus "Capitol-Stuven". Links de Ingang in den Kroog un rechts
de Ingang in't Kino. Klick up to'n Vergröttern! (Fotomontage Klås)

Dat weer jüst dee Tiet, as Freddy Quinn mit sien "Junge, komm' bald wieder ..." groot rutkeem un as Nummer Een mit veerteihn Wuchen in all de Hitparaden 'n niegen Rekord opstell, Elvis Presley in Düütschland statschoneert — un mit "Muß i denn ..." oder "Kiss me quick" op 'n Markt weer, Connie Francis vun den "Schönen fremden Mann" drööm, åvers ok de "Kuba-Krise" in de Gangen weer. Een Johr dornå sä Amerika's Präsident John F. Kennedy "Isch bin ein Berliner" un worr 'n half Johr låter ümbröcht. Nich to vergeten de Flootkatastrooph in Hamborg, dat Radio weer veertig Johr oolt, dat ZDF keem evenso in de Gangen as de Football-Bundsliga, un, wat 'n Schandål, ok de "Pille" worr geboorn. Ludwig Erhard löös Konrad Adenauer as Bundskanzler af un de Fehmarn-Sund-Brüüch möök den Weg frie nå Skandinavien, ok för de niemoodschen Fischstäbchen, dee vun Amerika ut de Welt erobern dään.

Wo weer ik vör düssen Utfloog in de Geschicht noch ståhn bleven?
Ach ja — bi de Capitol-Stuven! Wat harrn doch de Stammgäst all bedenken, as dat miteens heten dä, een niege Kröger övernimmt de "Capitol-Stuven". Man dee worrn gau ut 'n Weg rüümt, denn Alfred un sien Karina passen so richtig in de Welt, as man so seggt. So männicheen Problem mit opsternååtsche dune Gäst löös' he mit sien'n stååtschen Buuk, hee schoov se dormit eenfach ut de Döör ruter.

De Borbyer "Capitol-Stuven". Links de Theåter-Såål, mit de Trepp för denn Filmvörföhrer; rechts dat Hööfthuus mit vörn de Kroog un achter de Ingang nå't Kino. Klick up to'n Vergröttern!

Un wat kunn man bi Alfred goot eten! Sünnerlich de Brååtwüst weern di een wohre Delikatess. Wat hee sik dormit ok för Möögd mit geev, süht man all doran, dat he de Wüst nich vun elkeen, sonnern vun 'n Slachter ut Kropp måken leet un dee denn mit sien'n olen Daimler jede Wuch persönlich afhålen dä.

Un denn de halfdoden, Dummtüüch, wat segg ik dor, de doden halven Hähnchen! Dat weern Kavenzmänner vun besonnere Åårt! Vun dee Måhltiet weer man all meist satt.

Tominnst Ingrid, een lütt söte Deern, dee Klås in de Twischentiet kennenlehrt hett un de nu all över föfftig Johr sien Fru is, harr domåls ehr leve Möögd mit dat nakerte Floogobjekt. Ja, un denn worrn düsse hitten Deerter, dee man ja blots mit de Fingers eten deit, serveert. Dat harr ok all sien Richtigkeit! Man miteens worrn to düsse Fleegers ok noch lütte Schötteln dorto geven, mit Wåter in un 'n Zitronenschiev op de Randkant opklemmt. De beiden keken sik mit grote Ogen an! Wat nu??

"Weetst du, wat dat to bedüden hett?", froog Ingrid.

"Nee", ånter Klås, "schüllt wi dat womöglich dorto drinken ... — to dat Hähnchen?"
Beide keken verbiestert in de Runn, üm to seh'n, wodennig de annern dormit ümgåht, åvers Pustekoken, see weern to Tiet de Eenzigen, de 'n halve Håhn eten dään.

"Ach wat", sä Klås, "dat mååkt wi ganz anners. Wi fråågt eenfach mål!"

Ingrid harr keen goot's Geföhl dorbi, ehr weer dat wat schenant. Man as de Bedeenung mål wedder in de Neegte keem, froog Klås ehr, wat dat mit de Schötteln to bedüden hett, weern doch gor nicht bestellt.

Dor seggt dee doch glatt: "Die sind zum Händewaschen nach dem Hähnchenessen!"
"Sühst woll", seggt Klås to sien Ingrid, "wenn een dumm fråågt, kriegt he ok 'n dumme Antwoort."

Un se kregen sik dermåten dat Lachen, dat an Wiedereten nich mehr an to denken weer. De beiden güngen denn de Treppen nå'n Keller dål, wo de Toiletten un Waschrüüm weern, un wuschen sik ehr Hannen op konventionelle Åårt un Wies.

Middewiel sünd all dree Hüser weg un Eckernför hett gor keen Kino mehr.

De Berufsschool vis à vis vun de "Capitol-Stuven", in dee Klås sien eerste Utbillen harr. Klick up to'n Vergröttern!