Bummel dör Bremen
Deel 4: Böttcherstraat / Balge

vun Meike Balzer-Fraun

Eenst en smuddelige Straat vun'n Markt rünner na de Warften un Anleegstellen an de Werser. Vele arme Handwarkers, faken Böttchers, harrn hier ehr lütte Hüüs. Allens 'n beten verloddert. De Koopmann Roselius — de Keerl, de rutfunnen hett, wo een dat Koffein ut den Kaffe rutkriggt — hett na un na allens opköfft.

Bernhard Hoetger un'n poor annere Bomeester schullen de hele Straat nie maken. Blots dat Huus Nummer söss vun 1588 schull stahn blieven.

De "Lichtbringer", dat Bild, dat Hitler fiecheln schull. "Lichtbringer" heet op Latiensch "Lucifer" — hett Hitler opletzt de Anspelen verstahn un weer dorüm füünsch?

Hoetger, Maler, Bildhauer un Bomeester, harr 1934 allens oppe Reeg. Un batz weer dat in de Nazi-Oogen en ‚Kulturschande'! Wat nu?

Dat Hoochbild "Lichtbringer" imponeert över'n Ingang to de Böttcherstraat.

Hoetger weer en glöhnig Anhänger vun Hitler un sien Denkwies, un dit Hoochbild schull Hitler as Lichtbringer wiesen. Roselius un Hoetger hefft dat Hoochbild 1936 ophungen, üm de Straat mit all de Kunstwarken to wohren, Hitler also to begööschen. Hoetger sä dorto in en Breef an en Fründ: "Damit glaube ich nun endlich, der Welt beweisen zu können, wie sehr ich unseren Führer und seine Taten verehre." (Dat much ik lever nich op Platt seggen.)

Hitler aver smeet em stantepee ut de NSDAP un stell de Straat ünner Schuul un Opsicht vun de Partei. Nee, he harr dor keen Gefall nich an funnen — he wull bloots de Nawelt wiesen, "was in der Zeit vor unserer Machtübernahme als Kultur und Baukunst ausgegeben worden sei."

Wat kriegt wi nu in de Böttcherstraat to sehn?

To'n Bispeel dat Paula-Becker-Modersohn-Huus, en Utstellen mit allerhand Biller vun de Malersche ut Worpswede un Warken vun Hoetger. Den Handwarkerhoff mit de lütten Stadtmuuskanten un den Söven-Fulen-Brunnen, en Glasblaser, en Goldsmitt un en "Bonbon-Manufaktur". Ik wöör dor Bonschenmaker to seggen.
De Nr. 6, dat Roselius-Huus, is en smuck Museum, wo een sehn kann, wo so'n rieke Bremer Patrizier-Familje leevt hett.

Dat Klockenspeel

Kannst ok luustern, wenn dat Klockenspeel mit de Klocken ut Meißen Musik speelt.
Langs de Straat kannst fein eten un drinken un för veel Geld moie Saken köpen.
Natt un Dröög gifft't ok in'n ‚Schüttinger', wo se in de Gaststuuv Beer bruut. Mit rein Water! Anners as in de olen Tieden, wo dat Water ut de Werser keem. Dunnemals lepen af un an Schrie'er dörch de Straten un bölken:

"Heute wird bekannt gemaket, dass keiner in die Weser kacket. Morgen wird gebraut!"

Den Dag schullen de Lüüd ehre Schietammers nich inne Werser leddig maken, sünnern mal'n Dag dormit töven.

In de Straat rin mütt wi över de Balge weg. Dat weer en Siedenarm vun de Werser. Eenst kunnen hier veel lütte un gröttere Scheep mit ehr Waren bet dicht an den Markt rankamen. Denn is se verslammt, later hefft se ehr dichtsmeten.

Noch en Henwies op de Balge gifft dat ok in de ‚Wachtstraße' merrn op de Straat bi den Ingang to den wunnerbaren Laden, wo du allens för dien Goorn köpen kannst.