23. April — Dag von't Bier

vun Behrend Böckmann

2022, so seggen dat dei Tåhlen, hett jeder Düütsche in'n Schnitt 92 Liter Bier drunken. "In Schnitt" will heiten, dat dortau ok dei räkent warden, dei anne Modderbost orrer as Kranke an'n Dropp liggen. Dat will ok heiten, dat nich mihr so väl Bier drunken ward, denn 1980 keemen knapp 146 Liter up jeden Düütschen. Dormit liggen wi Düütschen achter Tschechien un Österrriek up Platz „Drei“. Dei Bierbruger denken, dat dat dorvon kümmt, dat wi ümmer öller warden un olle Minschen nich mihr so väl Bier drinken un taun tweiten dei Gesundheitsfimmel väle dorvon afhöllt, sik mål 'n Schluck tau genähmigen.

In't Wennjohr 1990 hett sik in Rostock sogor 'n Düütsche Bierdrinkenunion (DBU) billt. Sie wiern gägen dat utlännisch „Dünnbier“ un hett mit den Spruch „Schwerter tau Bierhumpen“ för sik Reklåme måkt. Bi dei iersten Wåhlen taun Mäkelnborger Landdach an'n 14. Tüffelmånd (Oktober) 1990 kreech dei Bierdrinkerpartei taun iersten un ok taun letzten Mål 0,6 Purzent Wählerstimmen. Tau dei Bundsdachwåhl in't glieke Johr wür disse Partei denn doch nich taulåten.

Hüt weit man, dat Wien all vör mihr as 7000 Johr in Persien un bi'n Bu vonne Pyramiden in Ägypten vör mihr as 4500 Johr Bier drunken wür. Bier keem so as Kaffe morgens, meddachs un abends bi Arm un Riek up'n Disch. Un Bier wür nich blot gägen den Döst drunken, sonnern Bier keem ok as Biersupp mit schlågen Eigäl, Honnig un Kannehl up'n Disch. Un dat gifft sogor 'n Bierkauken, son'n Oort Pottkauken, wo denn Bier gägen Melk in'n Deich uttuuscht ward.

Dei Bierbrugerie wür œwer Johrdusende taun Kunst, in Mesopotanien erfunnen un Bier wür villicht all bi'n Tormbu von Babylon drunken. So as dei Minsch sik mit denn Anbu von Gasten, Roggen, Dinkel un Weiten befåt hett, so versöcht hei ok, disse Küürns dörch Drieben (Keimen) un wedder Drögen in den nödigen Malz ümtauwanneln, üm denn ut den Malz mit Hoppen, Gest (Hefe) un Wåder Hellbier, Dünnbier, Schwattbier, Weitenbier usw. tau måken. In männig Order schräben Landsherrn, Stadtrat orrer Handwarkergill vör, woans dat Bier tau brugen un untauschenken is, so taun Bispill bi Kaiser Barbarossa in't 12. Johrhunnert orrer denn bavar'schen Herzog Albrecht IV. in't 15. Johrhunnert. In'n Order von'n 30. Näwel-
månd (November) 1487 för den Läbensmiddelmarkt in München wür vörschräben, wat Bierbruger inhollen süllen, dormit dat Bier ok würklich Bier is. Dat gellt hüt as Anfang von dat „Reinheitsgebot“, dat an'n 4. Lentmånd (März) 1918 dörch den bavar'schen Landdach fastschräben wür. Reinheit wat dat Kuurn angeiht, un rein süll dat Bier sien von Rauschmiddel, as dat wiern in't Middelöller Bilsen- un Wörmkrut, Schlåpmohn, Dollwurz (Tollkirsche) un noch anner Såken.

So'n blanke Bruukettel is doch ok ein Fest för't Oog!

An disse Reinheit keem ok dat olle Kniesenack ut Güstrow nich ümhen. Hoffmedi-
kus Georg Detharding (1645-1712) schrifft 1706 'n Låwleed up dat gaude Güstrower Kniesenack, dat bet taun Anfang von't 19. Johrhunnert brucht wür un üm 1850 för teihn Johr inne Feltensche Brugerie inne Mœhlenstråt wedder in Gang keem. Dornå brucht Korl Müller af 1884 dat Kniesenackbier in sien Brugerei „An'n Barch“ un schenkt dat inne Gaststuf vonne „Höll“, låters „Klause“ ut. Sülfst tau VEB-Tieden wür noch Kniesenack in Güstrow brucht un nå dei Devis „Båben in'n Häben gifft dat kein Bier,/ wi blieben giern ünnen un drinken't hier“ drunken.

Hopfen un Malz... un so wieder!