Wi weern mit 12 Lüüd ünnerwegens op de Tour dörch den Pfaffenwinkel. Kennen lehrt hebbt wi uns op de Radtour vun München no Straßburg.

Wi kemen ut ganz Düütschland un so hebbt wi jümmers een Tour mookt ut een Bundsland. Ploont vun de Lüüd, de dor tohuus weern. Also dütmol de Lüüd ut München. De Hotels/Pensionen weern bestellt. Wi bruukt uns also keen Stress moken.

Un los güng dat 27.4. - 10.5. Wunnerbor, nich to warm nich to koolt, un jümmers deftig Eten an'n Obend. — As wi denn so üm den Ammersee radeln, fung dat an to sneen. Mookt nix, köönt wi af!

Doch dor hett'n Uul seten. Scheune dicke Flocken, jümmers mehr un jümmers mehr kemen vun'n Heben dol. — In Raisting güng nix mehr. Wi kunnen nix mehr kieken un de Autofohrer ok nich.
Un so sünd wi denn to'n Bohnhof fohrt.

De Bohnhofvörsteher keem persönlich un wi hebbt no en Verbindung no Steingaden froogt. 12 Lüüd mit Gepäck un 12 Fohrrööd.
"Jo mei, wartens a Moment, i telefonier."

Tja, un denn keem de normale Tooch mit'n extra Wogen för uns! — Wat weern wi glücklich. Intwüschen weern wi natt bit op de Unnerbüx.

"Alles einsteigen, der Zug fährt gleich ab!"
Wi harrn Platz noog un hebbt allens, wat wi so an'n Lief harrn, in dat Afdeel verdeelt. No kotte Tiet weer dat en Sauna. Un wi glücklich un tofreden.

An de nächste Station keem en Ool Mudder in dat Afdeel: "Himmel noch amol, wos is denn hier los?"
Uns Scherzkeks ut de Gruppe antert: "Das ist heute das Sauna-Abteil!"
"Jo, waas, mei, gibt's sowas? Da geh ich lieber. So viel Nackerte auf einmal, na, des is mir zu viel!"

In Steingaden stunn de Wirt vun'n Linderhof — wi harrn ut Raisting telefoniert — mit'n Peeranhänger un twee Range Rovers. De Rööd in'n Hänger, wi in de Autos, un af no boben in' t Hotel.
Twee sünd mit Fohrrad no boben fohrt. De harrn de Nääs noch nich vull.

In't Hotel geev dat Grog un en scheune warme Supp. Un de Clou: in jeedeen Bett leeg en Warmbuddel. Dree Dog sünd wi bleven un hebbt de Tour mit Auto to Enn bröcht. Ober jümmers an'n 1.Mai kümmt dat Erinnern.

Un, wann weer dat? —— 1985...