vun Meike Balzer-Fraun

Lisa ehr Öllern harrn in Brundorp en Hoff op'n Hahl pacht.

Dor is se 1935 op de Welt kamen un opwussen. As se so üm un bi söss weer, is de Familje na Bremen-Hoorn trocken, wo ehr Papa Arbeit op en groten Melkveehbedrief kreeg.

To Huus hefft se Platt snackt. Wenn se mit ehr Mama, den Broder un de twee Süstern mit de Stratenbahn ünnerwegens weren, mussen de Kinner de Snuten holen. De Lüüd schullen nich marken, dat se Buern weren.

Inne School hett Lisa ins mal fraagt, wat dat "der Teller" oder "die Teller" heet. De Lehrersche hett de Kinner aver verkloort, dat se ehr nich utlachen dörven. De Deern kunn dat ja nich weten, wieldat se Plattsnackersche weer.

Lisa wull to un to geern Krankensüster lehren. Wieldat se to jung weer, woor se aver eerst mal Deenstdeern in en Huushoolt in Bremen. Dat hett ehr gor nich toseggt, se wull doch wat lehren. Mit 21 güng se korterhand na de Swiez as Kinnerdeern bi en feine Familje. De Huusfru nööm se jümmers ‚meine Germania'.

Endlich de Utbillen in Bremen, mit en Fründin de Stuuv in't Wahnhuus för Krankensüstern delen. Utflöög, Freetiet! Lang un geern hett se in Bremen, Hamborg un Stuttgart as Krankensüster arbeidt un de wollverdeenten Ferien op intressante Reisen rund üm dat Middelmeer to tobrocht.

Lisa is faken na Brundorp torüch kamen. De Sommerferien op Besöök bi ehr Verwandtschop, wo se ok bi dat Kinnerlandverschicken in'e Kriegstiet leev un na School gung.

Op en Vedder sien Hochtiet hett se sik in ehren Mann verkeken. Se hefft 1974 heiraadt, un Lisa is to em na Brundorp trocken.

"Wenn du en Buern heiraadts, denn heiraadts du nich blots den Mann, man ok den Hoff, sein Öllern un dat ganze Dörp. Anners hest nix to vermellen."

Mit ehren lütten Jung, de Arbeit oppen Hoff un de Pleeg vun ehr Swiegeröllern hett se den leevten Beroop na en poor Johren opgeven müsst, man dat Reisen kunn se ok nu noch geneten. Geern besinnt se sik op en Reis na Italien mit ehr Italjeensch-Klass vun de Volkshoochschool. Wat hefft se dor allens sehn, fein eten un drunken un so schöön italjeensch snackt! Oppen Hoff un mit de Navern hefft se denn wedder Platt, mit ehren Söhn Hoochdüütsch snackt.

1995 is Lisa ehr Mann inslapen. Ehr Söhn kunn den Hoff övernehmen, un se hett em hulpen.

Lisa hett nu ehr Wahnung op den Hoff, is tofreden, dat se sik alleen versorgen, noch Auto fohren un den Huushoolt smieten kann. Kontakt mit de ole Fründin, de se faken in de Swiez besöcht hett, mal in't Kino, namiddaags en Kaffee Latte, mit Naverschen Korten spelen, …..
"Ik harr en beweegt Leven, veel Freuden, un ik leev noch geern!"