vun Meike Balzer-Fraun

In'n Juni 2025 fiert wi 100 Johr Füerwehr Brundörp. Ok en Festschrift schall dat wedder geven. To de dore Tied bestunn de Füerwehr ut Mannsminschen. Aver ok de Fruuns schallt vörtüüg kamen. Hier vertellt se ehr Geschichten.

De Fruens vun de Füerwehrlüüd weren dunnemals ja keen ‚richtig' Füerwehrfruens, man ik nööm se mal so, wieldat ehr Arbeit för dat sotschale Leven in't Dörp un vör allens för dat Inkamen vun de Füerwehrkass en groot Bedüden harr. Veer vun düsse nu heel ole Fruens hefft mi op Platt vun ehr Beleevnissen vertellt, un ik heff dat opschreven. Op Platt, denn dat weer domals de ‚Amtsspraak' vun de Füerwehr.

Den gröttsten Verdeenst harr de Wehr alljohren bi dat Heringseten an'n Sünnavend vör'n eersten Advent.

"Heringseten" heet eerst mal en Fatt Söltheringe ut Bremerhaven rankriegen un över Nacht watern. Mit Water ut'n Soot. Dor langt keen Ammers nich, dor bruukst Baljen för — un Mannslüüd mit Knööv. Denn ole warme Kledaasch an. Dat rüükt un dat is koolt inne Schüün. En ole Schöört vör un en scharp Mess rut. Nu heet dat 700 Heringsköpp af- un de Fischbüük opsnieden. Utnehmen, de swatte Binnenhuut afkratzen, aftehn, utgraden un denn so veel as mööglich lütte Graden rutpuhlen. Heringsmelk anne Siet packen. Dree Fruens un de Börgermester sünd dor bald een Week lang mit togang. Na ehr Arbeit oppen Hoff. Dat duert, de Rüch piert, de Fööt sünd koolt. Schöön, wenn dat twüschendörch mal'n hitten Grog gifft! De Heringe warrt för Suren Hering, Sahnehering un Matjes sorteert. Nu langt Ammers. De Fisch warrt koolt stellt, un de Fischfruens warmt sik bi Punsch un Grog eerst mal düchtig op. Dorbi hölpt ok ehr Keerls woller mit. Wat de tokamen Daag mit den Fisch passeert, dat warrt hier nich nipp un nau verkloort. Dat's en Dörpsgeheemnis un warrt verarvt. Blots so veel: Een bruukt noch 24 Buddeln Etig, 5 Tüten Gurkenkrüder, sure Gurken, Appeln, Zibbeln, un veel vun ‚dat vertellt wi nich'. 15 Liter Bottersahne geev dat domals bi de Molkeree.

Männicheen Johr hett en Fru ut uns Dörp fief Mark dorför kregen, dat se so üm un bi 350 Stück Heringsmelk för den Sahnehering dörch en Seef röhrt hett. Wat se dat mit en Sleev oder en ‚Flotte Lotte' maakt hett, weet wi nich. En elektrisch ‚Pürierstab' hett se aver wiss nich hatt. Düsse Sooß weer woll utermaten lecker. Man as dat so löppt, de fief Mark schullen eens Dags inspoort warrn. Nu kennt narms mehr dat Rezept, un blots de ganz olen Lüüd besinnt sik noch op den Smack vun de ooltmoodsche Sahnesooß.

An den Festdagsmorgen vun't Heringseten mit Tombola un Danz oppen Saal sitt de Fruenslüüd, de sik Intrittskorten köfft hefft, kommodig bi'n Putzbüddel, wieldess de Füerwehrfruens den Matjes kloor maken doot. Se deckt de Dischen oppen Saal in de Weertschop, un se plätt de smucken witten Schörten, de se avends bi't Serveren vör ehr feine Kledaasch binnt. Jeedeen Füerwehrfru mutt en Ammer schellte Katuffeln oder en Stück Speck aflevern. De Weertsfru kaakt 20 Liter Specksooß. In ehren Waschpott kaakt se de Katuffeln. De denn heel oppen Disch to kregen is so licht nich! Dat sünd ja allens ünnerscheedliche Soorten.

Een vun de Fruens harr mal Glück in't Unglück: Se kreeg ehr Büx in de Keed vun't Rad un güng mit den Ammer Katuffeln koppheister. Blots twee Katuffeln sünd dorbi rutfullen, wieldat se en Dook över den Ammer bunnen harr.

Eerst so gegen Klock ölven, na't Eten an'n Kökendisch un den Afwasch vun Hand, ganz ahn Spöölmaschien, aver mit Sluck twüschendörch, köönt de Füerwehrfruens ehr Schörten an'n Haken bummeln un ok endlich mal sitten gahn — oder danzen.