Dei beste Fründ ward dei gröttste Fiend

vun Behrend Böckmann

Dat is ja nu all Johre her un väle Minschen ünner uns keemen ierst up'e Welt, as dei Iesern Vörhang twüschen Ost un West un dei Muer in Berlin all Geschicht wiern. Sei mössten sik nich mihr as ehr Öllern un Grotöllern mit Lihrsätz as „Dei Sowjetunion is unser bester Fründ“ orrer „Dei Imperialismus is unser gröttster Fiend“ befåten un dat dörch gaude Arbeit an jeden Dach an jeden Urt jeden Mitmenschen wiesen. Un ok wenn dei Rode Armee Düütschland von'n Faschismus befreit hett, so wiern dat in'n Volksmund nie nich dei Befreier, sonnern dei Russen. Größing säd ümmer: „Schöne Befreier von Speck un Eier!“ Un so wier Größing nie nich bet up einen Russen gaut up tau schnacken, denn dei Ein harr ehr Solt bröcht un gägen Gurken, Tomaten un Zipollen ut'n Gorn intuscht. Un wi Kinner harrn tau dei Tiet blot Biller von dei bösen Russen as Unwäsen un nich von Minschen in'n Kopp.

Uns Tant Henny ut Lübeck harr ehrn Russenbammel in'n Westen låten un keem uns denn mål œwer dei gräune Grenz besäuken. Ok sei säd: „Dat mit dei Befreier, dat is allens Lœgenkram. Dat willen's juch bibögen.“ Ehr Mann wier as einzigster ut'e Verwandschaft in Russland vermisst un is ok nie nich wedder taurüchkåmen. Bi'n neechsten Besäuk mit 'n Toch wiern all Popieren nödig. As sei tau uns Freud Bananen utpacken däd, glöwten wi, dat sik dat üm besonnere Gurken hanneln däd. Mudder harr grote Freud an dat Pundspaket Kaffe, twei Poor Perlonstrümp, 'n Stück gaut rükend Seip un weiket Klosettpopier. Un denn leegen dor för uns Kinner 'n Tüt Haribolakritzen, twei Kugelschriewer un twei Westradiergummis as Mitbringsel up'n Ätdisch inne Wåhnstuf. Un an dissen Ätdisch hett Größing denn ok ümmer un ümmer wedder dei grugelichen Geschichten von „Schöne Befreier von Speck un Eier!“ vertellt.

Un dat künn's ok, denn gliek näben dei Husdör wür jederein wohrschucht: „Kam rin un schnack di ut, gåh rut un holl dien Schnut“. Disse Spruch wier up 'n Kachel målt un göll ök för uns Kinner: dat, wat tau Hus an'n Disch vertellt un beklœtert ward, dat geiht keinen annern wat an, nich up'e Stråt un nich inne Schaul.

Un so wier Ulbricht inne Schaul dei gaude Parteiminsch un tau Hus dei „Puffvadder“ ut Leipzig. Œwer mit dei Tiet wür man ok insichtig, dat dei bösen Russen ierst dörch dei Düütschen in'n Krieg bös måkt würn. Un denn keem russ'sche Kultur tau uns. 1948 singt un danzt dat Alexandrow-Ensemble up 'n Berliner Gendarmenmarkt „Kalinka“ un dei Berliner jubeln, 1949 gifft dat „Suliko“ taun 70. Geburtsdach von Stalin up'n Eterna-Platt, dei Marinechor vonne Schwattmeerflott kümmt nå Düütschland un all singen „O Abendklang, Vecherniy zwon“. Un denn is dor Dmitri Schostakowitsch (1906-1975) mit den russ'schen Walzer Nr.2 un sien weltbekannte „7. Leningrader Sinfonie“. Ein Dawid Oistrach (1908-10784) spält dei Fidel as kein anner. Galina Ulanowa (1910-1998) von't Bolschoi-Theater Moskau danzt den Schwan as kein anner Ballerina, dei russ'sche Zirkus-Clown Oleg Popow (1930-2016) leet ganz Düütschland schmüstern. Un so nå un nå frünnt 'n sik an, ut einstig Afwiesung wür Fründschaft — un näbenbi beläben all in Ost un West, wat Koller Krieg is.

Œwer dat wier ok dei Taustand, wo einer den annern nicks däd un man dörch Verhanneln ümmer wedder den Weltfräden redden künn. Un denn keem dei Muerfall, dörch Verhanneln lött sik dei Iwan dorup in, dei DDR tau verlåten un dat dei Ami in't einig Düütschland blifft. Un dei Ami hett nu 'n licht Spill, mit Coca-Colo un „Chewing Gum“ all dei in'n Osten antaufaudern, dei sik nich mit Kwas un Borschtsch anfrünnen künnen. Schritt för Schritt kümmt man ok vöran, steiht twors noch nich as Napoleon vör Moskau, is œwer mit Hülp vonne ukrain'schen Europäer dicht anne Scher tau Russland rückt, un ut 'n Techtelmächtel ward 'n militärisch Operation, wat wieder nicks as Krieg is.

Nu sünd dat nich dei flassköppigen un blåchögigen Germanen as Weltenredder, sonnern villicht dei Nåkåmen von dei barbar'schen Rieder, Krieger un as Süper bekannten Skythen, dei inne Tiet twüschen dat sösste un vierte Johrhunnert v. Chr. vonne Mongolei un Südsibirjen nå Osten wannerten un denn an 'n Dnepr in Kamorskoje in'n hütigen Deil vonne Ukrain sesshaft würn. Dit Volk hett dunnemåls all wiest, woans man dörch Korrupschon tau wat kåmen künn, un is wull noch hüt dei Ogenspeigel för dei niegen Eliten an'n Dnepr. So as sik dei asiatischen Skyten mit hellenistischen Inschlåch dat in Kamorske inricht hemm', so richten sik hüt an glieke Stell' dei slawischen Ukrainer orrer ukrain'schen Europäer mit 'n åbendlännischen Inschlåch gägen den Osten un för den Westen in. Dat Land is grot, grötter as Düütschland, blot Düütschland hett 'n gröttere Wirtschaftskraft un spendiert dorher den EU-Kannedaten, dei ok giern un fix NATO-Maat warden mücht, ümmer mihr Waffen, dormit den bösen Russen up ewig dei Pust utgeiht. Doch sachtens geiht dei olle Munitschon ut, dei Scheitstöck, Kanonen, Panzer sünd gröttstendeils in'n Dutt un dei Rüstungsindustrie luert up Updrääch un höllt dormit dei Inflatschon up. Dei Europäer un dei Schutzmacht Amerika bruken dei grote un ganze Ukrain', üm uns åbendlännisch Kultur tau redden, nie nich ward 'n noch eins 'n „Balkanisatschon“ taulåten, as dat in'n Fall Yugoslawien passiert is. Ne, dei Ukrain' dörp nich in luder lütte Republiken as Galizien, Wolhynien, Bessarabien, Bukowina, Donezk orrer Luhansk uteinanner bräken.

Nu willen wi blot tauversichtlich sien, dat dat achter dei Karparten nich so utgeiht as an Hindukusch! Dor wier dei Amerikafründ Hamid Karzai (Johrgang 1957) von 2001-2014 Präsident, dei von'n düütschen Minister för Butenangelägenheiten Guido Westerwelle mihrmåls måhnt wür, doch mihr för't demokratisch Vörankåmen un gägen dei Korrupschen tau daun. Sünd uns Poletikers nu kläuker in'n Ümgang mit Wolodymyr Selenskyj (Johrgang1978), denn Karzai von'n Dnepr? Doch dat süht gor nich so ut. Uns Poletikers willen partut, dat wi uns abendlännisch Kultur mit uns liberale Demokratie as dat Muster taun Denken un Hanneln vörgäben un jederein sik dornå tau richten hett. Wenn Putin wat gägen dei „Eh för all“ un dei „queere“ Bewägung hett un mit Oppositschonelle so ümgeiht as wi einst mit Rudi Dutschke, denn is hei all 'n Fiend. Un måkt hei dat so as dat dei gauden amerikan'schen Frünn in Vietnam, in'n Irak un annerswo måkt hemm', denn is hei noch 'n grötterer Fiend. Un so wür ut den besten Fründ in gaut dörtig Johr dei gröttste Fiend, 'n würklichen Verbräker, dei Barabbas von't 21. Johrhunnert un ut Wolodymyr dei Johrhunnertmärtyrer Jesus. Un dei Ukrain warrt tau'n Karkhoff. För beid Natschonen.

Doch dat Volk ward nu nå mihr as tweidusend Johr inseihn, dat Barabbas an't Krüz hürt un dei düütschen Utgåben von 2.558.391.406 Euro as Hülp för dei Ukrain' würklich nödig sünd, üm den nu gröttsten Fiend Putin lütt tau kriegen.