Hogen Niejohr is ok dei Dreikönigsdach

vun Behrend Böckmann

As ut dei Stiernenkunnigen inne Wihnachtsapporten von Lukas un Matthäus œwer dat Wunner in'n Stall tau Bethlehem mit dei Tiet Königs würn, hett sik dat so ergäben, dat König Balthasar in'n rodet Habit, dat mit Hermelin besett't is, up'n Elefanten vörritt un sien Kron œwer den niegen König höllt. Up Kamelen keemen achteran König Caspar in 'n güllen Habit, dat von Brokatstickerien schämerte, un hei schwenkte 'n Pott Wiehrok œwer dat Kind; un König Melchior in'n gräunen Matäng, dei mit mit Rükels von Myrrhe un Balsamholt dat Kind bewunnern un ihren deit. Up anner Biller kümmt König Caspar as 'n Afrikåner up 'n Elefanten, König Balthasar as Asiat up 'n Kamel un König Melchior as Europäer up 'n Pierd.

Un mit dei Tiet hett sik dat ok so ergäben, dat dei 6. Hartung (Januar) dei Dåch för't Dreikönigsfest wür — un an dissen Dach bi einen dei Dannenbom plünnert un afputzt wür un anner dei Kinnelbier von't Jesuskind fieern. Ok hütigendåchs gifft dat Gägenden in uns Welt, wo Kinner äbenso as dei lütte Jesus inne Krüff vör Küll un Hunger bibbern un äbenso Gåwen nödig hemm', as Jesus sei nödig harr un vonne Könige kreech. Un so wür dat ok Bruk, dat sik Kinner as dei drei Hilligen Könige verkleeden, von Dör tau Dör gåhn sogor dei Dör von't Bundskanzleramt upstöten un Gåwen orrer Geld för Minschen in Not stiepen.

As Dank dorför gifft dat dissen Sägensgesang:

Hussägen tau't Dreikönigsfest

Jesus geef uns dienen Sägen
Holl Älend af, Füer un Not!
Bewohr uns vör Malessen,
vör Weihdåch un denn Dod!

Lat hier denn Fräden wassen,
åhn Kappeln un åhn Striet,
un ganz vergnäucht di deinen
hüt un för alle Tiet!