Dat kannst mi glööven!
Hebben vergeten, dat se Gott vergeten hebben

vun Pastor Johann Christophers, Ilten


To'n Anhören hier klicken:


Lesen deit Johann Christophers.


"Ein feste Burg ist unser Gott… "As Schoolkind har ik een lüttje Gesangbook. De Bookdeckels weern ut dünn roodklöört Papp. In Religionsunnerricht sungen wi of un an Lieder ut disse lüttje Gesangbook. Ok dat Reformationslied "Ein feste Burg ist unser Gott…". Un an d' Reformationsdaag gung denn de heele Schoolklaas in Auerk nah d' Lambertikark. Düchtig vull weer d' Kark an so een Daag.

"Ein feste Burg ist unser Gott…" — in Wittenberg stahn disse Worden an de Turm van d' Schlosskark. Du süchst disse Sprök all van feern. Veer Daag weern wi mit een Hopen Pastorn un anne Karkenlüüd in disse Stadt, wor dat vör bold fiefhunnert Johr losgung mit de Reformation. Överall worst du in Wittenberg an Martin Luther un de anner Reformatoren erinnert.


Luther-Denkmaal in Wittenbarg: Wüllt höpen, dat nich eerst Noot de Minschen wedder beden lehren mutt

Wi hebben uns in de Daagen düchtig mit de Reformation befaat'. Man wat mi besünners in d' Koop bleven is, is nich van fröhr. Nee, dat is een Satz van vandaag. De evangelisch Regionalbischof meen: "De meeste Lüüd, de hier leven, hebben vergeten, dat se Gott vergeten hebben."

Ut de heele Welt sünd hier Daag um Daag Minschen, de sük doröver freuen, dat se eenmal in Martin Luther sien Stadt komen. Un denn: "De meeste Lüüd, de hier leven, hebben vergeten, dat se Gott vergeten hebben"?

Ik seh een junge Fro mit Kinnerwagen un an hör Hand een lüttje Wicht. Vergeten, dat se Gott vergeten hett? In een Café twee ollerde Frominschen, se sünd van hier, dat kann ik höörn. Vergeten, dat se Gott vergeten hebben?

De Regionalbischof vertellt uns ok, dat de evangelische Kinnergarden un de evangelische School bi de Minschen, de in Wittenberg un drum herum wohnen, düchtig beliebt sünd.

Ik mutt noch eenmal an mi eegen Schooltied denken un an de Reformationsgottesdeenst. Wat de Pastor dormals sä, dat hebb ik vergeten. Man nich dat rode Gesangbook — un nich dat Lied: "Ein feste Burg ist unser Gott…"?


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


9.11.2016


na baven