vun Marlou Lessing

Herr, stah du doch op, dat nich Minschen dat Leit in de Hand kriegt!

Psalm 9,20

Ik mutt togeven, düsse Sprook hett mi al lang wunner nahmen. Woans hett de Psalmist, de Bibelschriever doch so fröh weten kunnt, wo dat utgahn wöör, wenn de Minschen de Regeln maakt?! Dat kannst wohraftig Hellsicht nömen!

Ja, hüüt hebbt wi all den Klimawannel in'n Achterkopp, wenn wi dat leest. Gier, Egozentrik un Egensucht hett allens vör de Wand fohrt. Man dat gellt ja ok för allens annere — minschlich Tosamenleven, Ümgang mit Deerten usw., ja: ok för de Religioon. Denn mal ehrlich: De Religioonen, de eentlich Oaasen vun Hilligkeit in en respektlose, besinnungslose Welt ween schullen — de Religioonen sünd keen beten beter as de Rest. Se predigt Krieg, se ünnerdrückt, belöögt un vergewaltigt Minschen. Nich jümmers, nich all — man liekers. Dat sünd ganz kloor de Minschen, de dor de Regeln maakt. Nich Gott.

Wokeen hett de Tögel in de Hand?

Eentlich hebbt wi noch nienich ünner Gotts Leit un Regeln leevt. Gotts Riek blifft dat feerne Licht, dat uns Welt erhellt un op ehr Bahn höllt. Tomehrst strahlt uns dat nich so hell as de Sünn bi uns, ehrder so, as weern wi so wied vun ehr weg as Saturn, Uranus orr de kole, düüstere Neptun, vun den ut de Sünn wenig heller as en normale Steern schient un ehr Kraft, em antotrecken, al bannig ring is. Ahn de feerne Sünn weer uns Welt heel un deel verlaren in't kole All. Wi beedt elkmaal "Laat kamen dien Riek!", wieldat wi dat weet.

Man woso is dat so en Drama, so en Weltünnergang, wenn de Minsch un bloots de Minsch dat Leit hett? Sünd Minschen nich ok good? Sünd se nich vun Gott good dacht? Wat för'n Fehler hett Gott dor inbuut, dat dat so scheef löppt?

Jedereen kämpft för sik? Süht dat Ergeevnis so ut?

Jesus weer in de Welt en "Loser"

In de ganze lebennige Schöppen sitt en gode Porschoon Egoismus. Dat is dat Funkschoonsprinzip vun de Evoluschoon — jedeen Leevwesen sorgt för sik, dorbi optimeert sik de Aart. Dat is dat Rezept, na dat dat Leven hier in de Welt wiederlöppt. Togliek schallt wi düssen inbuuten Egoismus överwinnen. Dat is de Opgaav, de Gott uns stellt. Bi Gott gifft dat keen Egoismus. Jesus hett uns wiest, woans dat op de Eer utsüht, en Wesen ganz sünner Egoismus — un woans so en Wesen, sünnerlich en Minsch, in uns Welt unweigerlich mallöörn un op de Streck blieven müss. Eentlich is dat Bispill vun Jesus en afschrecken een; man liekers trööst uns dat, denn dat wiest uns, dat reine Leevde mööglich is. Nich Macht, nich Sieg, nich Starkde is göttlich, sünnern bloots Leevde.

Wi weet nich, woans Planten un Deerten sik to Gott verhollen doot — wat se en Weten üm em hebbt, sik ok na en Erlösen vun dat ewige Streven un Kämpen sehnt... Dat gifft Henwiesen, dat intelligente Deerten Rituale un ok en Aart Religioon hebbt. Wi weet avers, wi högeren Leevwesen, de en Bewusstween entwickelt hebbt, wi weet üm Gott un lengt na Erlösen. Worüm maakt wi liekers so veel verkehrt in de Welt?

Ik glööv, de Weevfehler, den Gott in de Welt inbuut hett, is düt: För Freden, Tohoopwarken un dat Gode mööt all tosamengahn; för Egoismus, Terstören un dat Slechte langt een, de dor utscheert. Wenn all de Wapen dalleggt, langt een, de en Metz in de Tasch verstekt, un de Freden is perdü. Dat Gode brukt Kooperaschoon; Verenkeln un Isoleern is de Levensruum un dat Wesen vun't Slechte. Dat Gode is versehrbor; dat Slechte is de Standardfall. Wenn överhaupt, denn is düt de Arvsünn.

Süh, un mit uns Intelligenz, Plie un Bewusstween sünd wi opropen, düsse Vörbedingen to överwinnen! Noch is dat nich lückt; ok de Religioonen nich. Wi mööt dat avers schaffen, sünst — ja, sünst mallöört dat ganze "Projekt Minsch". Dat is uns meddewiel kloor. Gott hett uns nu mal dat Leit in de Hand geven, dat wi uns bewährt. De Minsch is so mächtig as nienich. Man nich Macht is göttlich, sünnern Leevde. Kiekt wi de Welt ut Gotts Ogen an, mit den Blick vun allümfaten Leevde! Vergeet wi uns sülvst, uns Vördeel, Komodigkeit un Gewinn! Laat uns för de ganze Schöppen mit Gott föhlen. Denn weet wi, wat to doon is.