L

laden

In'n wiedsten Sinn: Daten vun jichenswo na jichenswoanners transfereern. Een seggt t.B. ok "Ik mutt mi en niegen Billschirmschoner ut dat Internet laden." Dor meent een denn mit "laden" downloaden.
In'n engern Sinn: Daten vun'n Datendreger oder ut't Internet in'n RAM vun SeEhrn Computer bringen, so dat dat op'n Billschirm to sehn is un Se dormit wat daan köönt. — Je grötter de Datein, de Se laden wüllt, je länger duurt dat mehrst.

LAN

Afkörten för Local Area Network, en begrenztes Nettwark also, t.B. in en Firma.

Laptop

Ingelsch "Op'n Schoot". En ganz normalen PC, de avers so lütt buut is, dat Se em dör de Gegend dregen köönt un even ok "op'n Schoot" dormit arbeiten köönt. De Billschirm is dorbi as Deckel to'n Opklappen maakt. Noch lütter heet dat Notebook.

Laufwerk

Reedschap, de mit een Aart Datendreger tosamenhöört. In't Diskettenloopwark schuuvt Se en Diskett, un dat Loopwark kann de lesen un ok op schrieven. In't CD-Loopwark schuuvt Se en CD, un dat lest de; en CD-Brenner kann ok op schrieven. Ok de Fastplatt is en Loopwark; dor sünd Datendreger un Loopwark even fast tosaamwussen.

LCD

Ingelsch Afkörten för Liquid Crystal Display, dat heet op Hoochdüütsch Flüssigkristallanzeige. Dat is en Technik, mit de mennig Displays (Billschirme un Mini-Billschirme) arbeiten doot, t.B. bi Taschenrekner, Mobiltelefone, avers ok utwussen Computer-Flachbillschirme. Süh ok TFT.

LCR

Afkörten för "Least Cost Router", also Ringste-Kosten-Router. Dat sünd Programme, de mit dat DFÜ-Nettwark tosamenarbeit un dorför sorgt, dat bi dat Herstelln vun de Internet-Verbindung jümmers de günstigste Provider wählt warrt. Bekannte LCRs sünd t.B. de SmartSurfer vun www.web.de un Oleco vun www.oleco.de. Düsse Programme sünd ümsüss. Jedereen kann ehr downloaden.

LED

Afkörten för ingelsch Light emitting diode, d.h. Licht utsenden Diode — also en Lüchtdiode (hoochdüütsch Leuchtdiode). En stroomsparen lütte Lamp, de in de Elektronik an vele Steden insett warrt. T.B. gifft dat op de Tastatur stückerwat Lüchtdioden, de wiest, welk Modus inschalt is — Grootschrievmodus (Caps Lock), NUM-Modus usw. Ok vörn an't PC-Gehüüs un an annere Geräte gifft't LEDs as Kuntrull-Lampen.

Lesebestätigung

En korte formelle Bestätigungsmail, de de Afsender vun en Email kriggt, wenn de Empfänger de Mail apenmaakt hett. — Min Menen dorto is: Nienich! Toeerst mal sünd Lesebestätigungen en Problem bi Spam. Man överhaupt: Woso hett de Afsender dat Recht, to weten, wat un wannehr ik min Post lees? Wenn ik em anter, is dat fröh noog. Bi de Papeerpost gifft dat ok nich so en Kuntrull!

Wenn Se dat Verschicken vun Lesebestätigungen afschalten wüllt, köönt Se dat in SeEhr Email-Programm doon. Bispill Outlook Express: Menü Extras | Optionen, Registerkoort Bestätigungen, de Opschoon Keine Lesebestätigungen senden anklicken.

LHA

En Pack-Programm.

Link

Dat wichtigste Merkmaal vun de Websieden in't WWW: Wöör oder Biller op Websieden köönt de Egenschap kregen, dat se mit annere Websieden verknüppt sünd. Dat sünd denn Links (ok Hyperlinks nöömt). "Link" heet op Ingelsch "Verknüppen". Wenn Se de Muus över so en Link hollt, denn seht Se so een lüttje Hand. Wenn Se denn klickt, geiht de Websiet op, de dormit verknüppt is. Op düsse Wies köönt Se dörch dat WWW "surfen", dat Se över de Links vun een Siet na de neegste huppt un jümmers so wieder. — Allens, wat hier blaag un ünnerstraken is, sünd Links!

Linux

En stabiles Bedreevssystem för PCs op de Basis vun UNIX. Op dat eentliche Linux gifft keen Monopol as bi Windows, dorüm is Linux faken billig oder ümsüß to hebben (süh ok bi open source). Poor Anbeder hebbt avers Verschoonen vun Linux maakt, de wat beter utstatt sünd un denn doch wat kost.

Nadeel vun Linux: Veele Programme sünd bloots för Windows to hebben! Dat gellt sünnerlich för Speelprogrammen.

Lizenz-Software

Veele Programme sünd heel düür. De mööt Se betahlen, ehrdat Se dat Programm överhaupt to faten kriggt. Wenn Se't installeert, mööt Se en Kennnummer intippen, de bewiesen schall, dat Se'n rechtmäßige Köper sünd. Sowat is Lizenzsoftware. Mit den Koop hebbt Se de Lizenz köfft, dat Programm op 1 PC lopen to laten. Düsse Software dröfft Se nu nich eenfach kopeern un an all SeEhr Frünnen wiedergeven. Dat is denn illegaal.

Log, loggen

En Woort mit veel Bedüden. "Sik inloggen" bedüüd, sik mit de Benütterkennung (Passwöör usw.) in en bestimmten Beriek anmellen; mehrst passeert dat in en Nettwark. Man dat mutt ok nich hoochoffiziell mit Passwoort passeern; "Logs" nöömt een t.B. ok de Togriepen ut dat Internet op en bestimmte Websiet.

Log-Datei

En Datei, in de alle Vörgäng in en bestimmten Beriek optekent warrt — t.B. wa veel Togriep dat op en Datei geven hett usw. En elektroonsches Logbook also.

Logon

Dat Anmellen an en Bedreevssystem, bi en Nettwark orr bi en Programm. Süh ok bi Log.

Logout, Logoff

Dat Afmellen an en Bedreevssystem, bi en Nettwark orr bi en Programm. Süh ok bi Log.

lokal

Dat heet "nich in't Nettwark". Wat lokal löppt, finnt bloots op een Computer statt, ok wenn de Computer in'n Nettwark steiht un sik mit annere Computers uttuuschen künn.

lokales Netzwerk

Anner Begriff för LAN. En Nettwark mit begrenzte Utdehnung, in'n Ünnerscheed to't Internet.

löschen

En Datei oder'n Deel vun en Datei vun'n Datendreger wegmaken. Wenn Se en hele Datei löscht, fraagt dat Bedreevssystem mehrst mit'n lütten Dialoogfenster na, af Se dat ok würklich eernst meent.

LPT1

Steiht för "Line-Printer 1". En olen Naam för den Drucker-Ansluss.

Lüfter

Sitt in't Gehüüs vun'n Computer un köhlt de Elektronik mit'n beten Wind. Dat deit nödig, denn anners warrt de Kraam to hitt un geiht hopps.
Dat gifft mehrst een Lüfter för dat Netzdeel un noch wat extra, op jeden Fall een för den Perzesser.

LZW

En Verfahren to'n Komprimeern vun Bilddatein.