"Umweltschutz" kennen wi fräuher nich...

vun Hildegard Tölke


Vör mi anne Kasse in'n Supermarkt staiht ein ölleret Menske. Sei häff vandaoge ehrn Inkoopskorw in Huuse vergäten. Dei junge Kassiererin legg ehr 'ne Plastiktuten up 't Band, kick un meent: "Du häss doch wisse all wat van Umweltschutz hört. Plastik is ganz leip för use Umwelt. Wi aale möt upstunns, aale un uck diene Generation, ganz nödig wat för Klima- un Umweltschutz daun."

"Dat weit ick. Dat Wort "Umweltschutz" häbbt wi fräuher nich kennt. Aower Umweltschutz häff miene Generation jau aale alllange vörmaokt.
Nu luster eis maol tau!

Dei Melk haolten wi van 'n Melkwaogen in use eigenen Düppen, nich in Plastiktuten. Dat was use Umweltschutz! Flasken, Beierbuddels bröchten wi wedder trügge, dorhen, wor wi dei köfft harn. Dei wüdden rein wasket un faoken wedder bruuket. Dei häbbt wi nich in 'n Flaskencontainer twei schmäten.
Dat was use Umweltschutz!

Un wenn wi Kabuus, Wuddeln, Tüwwelken un Salaot köffden, dann harn wi ein 'n Korw off Netz dorbi.

Mangers packte dei Koopmann us dat uck in bruunet Packpapier off Tuten. Dit Packpapier schmeeten wi nich weg. Nee! Dor packten wi use Schaulbäuker in.
Dat was use Umweltschutz!

Üm mien eierste Läsebauk van 1945 is vandaoge noch — nao 76 Johr — so ein'n bruunet Packpapier. Schaulbäuker wüdden van Klasse tau Klasse wietergäwen. Un was in usen Füller kiene Dinte mehr, dann köfften wi Dinte un nich fortsen ein'n neien Füller ut Plastik.
Dat was use Umweltschutz!

Use Botters nöhmen wi mit in Pergamentpapier, nich in Plastikdeusen. Ännern Dag bruuken wi dat Pergamentpapier wedder. Dat was use Umweltschutz!

Passte dei Kleedung nich mehr, dann naihte use Mamm' off Oma dei ümme, mäök sei lüttker off kötter.
Tauhuuse harn wi bloß ein Radio, läöterhen ein'n lüttken Fernseher un ein Rad. Ein'n platten Radschlauch flickten wi sülwes.
Zeitungen schmeeten wi nich weg. Dei bruukten wi uck noch wieter, mangers in Stücken.

Un mit dat Wasken vanne Peiken un Kinnerdäuker in Emmer nöhm use Mamm' dat ganz genau. Dei Wind drögte dei buuten uppe Wäschelienen, nich dei Wäschetrockner mit Strom. Dat was use Umweltschutz!

Un mit'n Handraosenmaiher häbbt wi aohne Gestank un Spektaokel usen Raosen kort krägen. Dat was use Umweltschutz! Wi bruuken uck kien Fitness, wor wi us up so 'n schwattet Loopband affstrampelten. Wi löpen dei Treppen hoch, dat geew jao noch kiene Upzüge, dei Strom bruukten.

Nao Schaule, nao Karken un taun Inkoopen fäuherten wi mit Rad off güngen tau Faute. Un nich so at hütdaogs mit'n dicken Dieselmercedes vörfäuhern. Wi harn uck kien Mamataxi för 24 Stunnen. Dat was use Umweltschutz!

Dat Waoter drünken wi nich ut Plastikflasken. Nee, dat köm bi us ute Pumpen off ut'n Waoterkraon.

Schall ick di nu noch mehr van usen Umweltschutz verklaukfiedeln? Wichte, Wichte! Ick seihe jüss: Oh! Oh! Nu mott dei elektronische Kasse di uck noch mit Strom dat Wesselgeld uträken. Dat harn wi aale alllange in Koppe uträkt."


14.3.2021


na baven