Dormit sünd wi in Düwels Käöken kaomen!

vun Hildegard Toelke

Disse gräsigen Gespenster mit aal ehre Stickels häbbt sick nu uppe ganzen Welt verdeilt. Dormit sünd wi uck in Düwels Käöken kaomen. Du kanns dei nich inne Künne kriegen, nich dodhauen off verdriewen. Upn 'maol sünd sei dor un du kummps dorbi inne Kneie, nähmt di den Aohm taun Läwen, kummps in 't Krankenhuus off sogor up 'n Karkhoff, up Kösterskamp.

Nu is dei ganze Welt vull van dit Düwelwark van Corona. Un wi häbbt nicks, wat wi dorgägen setten könt! Use klauken Professoren häbbt us dat bitieden verklickert. Wat Mensken nich seiht, glöwt dei meisten nich. Aower nu häff us dat gräsige Virus bannig packt, häff us bie 'n Kraogen krägen. Corona maokt schlapp as 'n Plünnen. Wecke Kranke sükt so hendaol. Uck dei lessde Döspaddel begripp et nu wollsachte: Äöwerall luurt Corona up us!

Diabolisch Ping-Pong

Siene Billionen Beister häbbt us in usen Alldag total in ehre Klauen un häbbt dat äöwer us tau säggen. Nao buuten hen mit Mundschutz, kienein mehr dei Hand gäwen, nich mehr tausaomenkaomen. In'n Nu wassen dei Schaulen un Kinnergörns dichte; Karken taue un uck dei Museen un Konzerte, dei Fautball un Kinnerspälstäen, aals daon. Upstunns draihte sick dei Welt inne Familien un Fabriken trügge. Corona häff dat in poor Wäken henkrägen, aohne dat wi üm bi 'n Hals kreegen. Häff us anne Grund krägen. So sinnig packt us dei Angst, wenn wi aal dei Biller ute Krankenhüser seiht. Use Dokters un dei Krankenkschwestern daut, wat sei könt, aalemantau. Un uck in Supermarkt wecke dor anne Kasse sitten daut.

Wat kummp nu noch woll? Use Angela un aal ehre Minister häbbt us dei Hölle heit maokt. Tau Recht! Sei wassen kiene Glattschnacker. Aale verseukt dat Leipste för us mit Millionen Euros tau minnern, süss kummp dat grote Dichtemaoken. Wi haolt tausaomen, helpt us inne Naoberskup gägensietig, uck wenn man sick nich kennt. Dat is dei gaue Siete: Dat Mit'nänner! Un uck, wenn wi aale in Huuse bliewen mäöt, sünd wi nich allein. Nu dröpp un schnackt man an 't Telefon, nich mit denn AB (Antermaschien). Wi häbbt Fernsehen, Internet, Handy, Skype etc. un tau Äten.
Dei Tied löpp langsaomer. Corona bring us aale eine "historische Wende!" Wat wedd woll in Harwst 2020?

Schass maol seihn. Naoher is väles änners. Wi denkt trügge an dei Tied, an use Helden ut dei Krankenhüser und Pfläger. Sei verdeint väl mehr Achtung un uck mehr Geld. Wi aale schull'n dei mehr ästemeiern.

Dat vosse, drocke un riewhannige Läwen is utbremst. Dat Verquittken un dat Dubbeltup sünd eierstemaol vörbi. Un väle schöne Saoken, dei us so leiw wassen, häbbt dichtemaokt off daut sick verännern. Un noch wat hätt Corona henkrägen. Dei Smog in China is eismaol wäge. Wi mäöt taugäwen, Corona häff us dat Naodenken lert un besünners wiest, wo licht aals indutten gaohn kann. Wat us aale helpen kann, dat is dat ehrlicke Mit'nänner mit Maut un Fräe.