Schoolmisere?

vun Wolfhard Sauerbrey

Mann, dat gifft Saken in de Welt!
Mi hett mien Enkelin vertellt,
dat bi den Direx annerletzt
se harrn een Scholmeestersch verpetzt:
Se harr een Jung, de meist för dull
abasig Terror maken wull,

den harr se mit ehrn Knövel knufft,
man blots heel licht, so dör de Luft.
Nu geev dat jo een groot Geschrei,
de Öllernsprekersch maak Puhei,
se schulln de Lehrersch suspendeern,
villicht ok noch vör't Brett ziteern.

Kiekt mol: keen Lehrer is despotisch,
man oftins is de School chaotisch:
dor snackt se veel vun Inklusion,
welk Kinners kaamt ut een Region,
neem se meist gor keen Düütsch nich snackt,
de Öllern dat Erziehn nich packt,
neem se de Deerns nich respekteert
un elkeen Billen jüm verwehrt.

So süht dat ut. Nu steihst du vörn
un schallst de Kinner recht wat lehrn;
de Öllern geevt ehrn Deerns un Söhn'
blots af un an mol Stütt un Stöön.
Keen kunn dor woll to'n Respekteern
nich hen un wenn mol explodeern??

Ik heff mol in de olen Böker söcht
un vull Entsetzen dat tohopen bröcht,
woans se ins mal in de Scholen tageln —

dor dään di Dag för Dag de Prügels hageln!
Keen sik de Billers ankickt — nu, de weit,
wo good uns Kinners dat doch hüütdaags geiht!