Prima Klima

vun Friedrich Ehlbeck

Sitt de Sünn in'n Kabelboom,
is't noch lang keen Sünnenstroom!

Ward bannig Tiet, bald uptowaken,
wi möt wat för dat Klima maken.
Dat gifft all lang so'n groten Plan;
man hett uck praktisch all wat daan.
Dat hett all Resultaten geben,
de ward sogor an Heben schräben,
krüz un quer in lange Striepen.
So is dat beter to begriepen.
Jümmer woller gau un frisch —
un uck woller gau verwischt.
Jümmer woller is Alarm:
De Welt ward eenfach veel to warm,
wiel doch all de Nordpol schmüllt
un so de Nordsee öberfüllt.
Altohoop, de Kerls un Froon
mööt all wat för dat Klima doon.
De Politik will dor för streben,
jedereen schall dorna leben.

Dat warme Tüüchs is ganz okay,
man bloots, dat gifft ja doch keen Snee!

To Wiehnachtstied dor mol an denken,
warm Tüüch to köpen un to schenken
un mit Licht un Heizung sporn.
Dat helpt dat Klima mit de Johrn.
Dat Osterfüer makt so ganz krank.
De Fienstoffnerven liggt all blank.
De Fienstoff, wat man weten mutt,
makt up de Welt so veel kaputt,
wat mit keen Pilotenstreik
wedder uttoglieken geiht.

De Flegerie is nich gesund,
man beter blifft dat Dings an'n Grund!

Männich Minschen seggt jo stuur:
de Klimawannel is Natur!!!
Fudder ward normal doch kaut,
dordörch ward dat goot verdaut,
aber ward dat tweemol kaut,
denn ward dat Klima so versaut.
Dat markt man richtig bös
ganz dütlich inne Näs.
Wedderkauers frät veel Gras
un dorvun makt se Drievhuusgas.
Dat is, wat nich in't Klima passt.

"Methan finn ik wat Wunnerboors!
Di passt dat nich? Klei mi an'n Moors!"

Dat is ganz gefährlich stark
in den Serengeti-Park.
Dor sünd veel Massenwedderkauers binnen,
de mööt möglichst bald verschwinnen.
Sünd goot in Kiekschapp antosehn,
aber bruken deit man keen.
Bi Rind un Schaap kann man verlangen,
dat Drievhuusgas doch intofangen.
Dat Wedderkauerrülpsproblem
is de Natur nich angenehm.
Deswegen is nu uck all lang
de Wetenschaff dormit togang.

Fleesch eten, dat is ganz verkehrt!
Vun hüüt af an warrt vegeteert!

Keen Fleesch, blots noch vegetorisch leben,
dat hett' in Krieg all faken geben.
Dat is, as Politik dat seggt,
för prima Klima gor nich schlecht.
Wat Politik seggt, ward woll stimmen,
den Klimakrieg ward se woll winnen,
kann glieks in Ökoheben flegen.
De Natur hett nix dorgegen.
Poltik kummt sachs mit selten Fimmel
glattweg in söövten Ökohimmel.
Lat us man up'n Teppich blieben —
uck mit Natur nix öberdrieben.

Op de Flucht gaht al de Göös.
Sachten weet se: Dat endt böös.