De Polente, dien Fründ un Helper?

vun Günter Schiller


"Düsse dammigen Afzockers! Annerletzt Week heff ik 40 €uros afdrücken musst, nu grood hefft se mi allwedder blitzt, un nu kost mi dat 120 €uros!"

Jungedi, de Fruu is totol ut de Tüüt un lamentiert as unklook. De schöl'n beter an'n Bohnhoff de Asylanten kontrolleeren. Ischa en Wahnsinn, wat sik dor all'ns rümdrievt, aver nix dormit, de Polizei mutt ehre Innohmen generieren un de unbescholtn Bürgers utnehmen, is ja ok veel eenfacher so! "De Asylbewerbers" — un de Fruu legt nu richtig los —, "de warrt vun de Polizei afsluut in Ruh looten! De verhökert Drogen, kanns tokieken, un mokt de Frunnslüd an mit malle Spröök, wenn nich Schlimmers, jo, ober denn kiekt de Polizei weg, as dor nix wär. Ik glöv, de hefft Angst vör düssse Vageluten. Avers wenn ik dat ielig heff un ik mien Kinner no de Turnstünn or inne School mit'd Auto bringen mutt, denn staht se in Sluuplock un luurt, denn blitzt dat, ohn to donnern, denn staht düsse Schietkeerls achtern Busch, so as en Wegelagerer! Jo, so is dat, Mann."


Blitzkrieg op de Straten?!

All de Mannslüd an Disch nickköppt dorto, ok de, de to Foot oder mit'd öffentlichen Verkehr ünnerwegens sünd, wiel se ehre Pappe afgeven musst wegen to snell fohrn, villicht ok mit to veel Promill in ehrn Blootbohn.

Dor heff ik de Fruu kort mol wat frögt — worüm se ehre Kinner denn mit'd Auto na de School un to'd Sporthall föhren deit, ischa nich altowiet to Foot, un kregel is dat jo ok. Aftosehn wegen den soziolen Kontakt mit de annern Schöler.

Toerst kiek se mi so'n beeten füünsch an. Denn seggt se, "Du weetst jo, hütigendoogs is dat to gefährlich op de Straaten, wegen de Rasers un de annern Idioten, weetst Bescheed, ober de Polizei mokt dor jo nienich Kontrollen. Ik heff se mannigmols anpingelt un reklameert, aver nix is. Un uns een, de unbescholln Börger, de mööt betohlen!" — Un ut ehr Oogen funkelt dat lüchen Füer.


Schuld sünd jümmers de annern!

Dor is mi de Sprook för een Momang wegbleven op düsse Utsoog. Mann, heff ik to mi sülben seggt, woans kann een Minsch so unklook sien?!


21.6.2020


na baven