Ollerwarrn is keen Kinnerspeel!

Öber dat Ollerwarrn

vun Heinz Tiekötter


Churchill hett mol seggt: "Üm oolt to warrn, bruukst du 'n bannigen Moors in de Büx!"

All wüllt se oller warrn; man nich een will oolt sien. Dat gifft öllere Lüüd, de plünnert sik an, as wenn se Hippies weern. Du dinkst, se dräägt de Kledoosch vun jemmer Enkel op. Se meent, Ooltsien weer nix för jem. Dor mutt een gegenangohn!

Dorüm is dat ok beter, wenn du nüms no sien Oller froogst. Schoon gornich Froonslüüd, wenn se all öber söbentig, man noch lang keen tachentig sünd. Bi de kannst du di licht Arger mit so'n Froog inhanneln. Doch veel beter sünd wi Mannslüüd ok nich. Nülich harr mien Nober Beseuk vun sien Broder. Wi ünnerholln uns 'n beten öber den Gorrntuun henweg un snacken vun freuher. He weer en so'n Klookschieter, de allns beter wüss. Dorüm froog ik em no sien Oller. He anter, dat he an de Sosstig weer. Sien Broder lach un meen: "Sosstig Johr un 72 Moond is he!"


Gegen düsse Folen kümmt keen Botox mehr an!

Lang hollt düsse Stremel uns Leben nich an: Wenn de sosste Botox-Sprütten-Serie, de wöchentliche Kosmetikpackung un de Mittel ut Apthek un Reformhuus nix mehr bringt, denn is dat sowiet: Nu dreiht sik allns in dat Gegendeel üm. Grod noch wulln se vun di heurn, dat se för ehr Johrn attraktiv sünd, nu verlangt se all Respekt wegen ehr Oller.

Eben noch hett di de Negenunsosstigjohrige vertellt, dat he sik fit as'n Turnschoh feuhlt, nu sasst du em Achtung betügen, wiel dat he nu op de Tachentig to stüert. Beter is dat, wenn du em seggst, dat he sik good holln hett. Dorüm warn ik di: Du bewegst di op bannig dünnet Ies, wenn du no dat Oller vun'n Minschen froogst. De Falle geiht op, wenn dat heet: "Na nu schätzen Se mol." Liggst du mit dien Schätzung ünner sien wohret Oller, hollt se di för'n Schleimer. Liggst du doröber, speelt se den Beleidigten. Du kannst bi so'n Speel nich gewinnen!

Wenn du hüüt doch nochmol 'n Minschen drippst, den du sien wohret Oller ok ansehn kannst, denn is dat bestümmt noch een vun freuher!


"Gries is ok en fröhliche Farv!"


27.12.2019


na baven